लाखो रुपयांची हानी टळली : शॉर्टसर्किटने आग लागल्याची शक्यता
वाळपई : नगरगाव येथील एका सुपर मार्केटला शनिवारी सकाळी अचानकपणे आग लागून मोठ्या प्रमाणात आर्थिक नुकसान झाले. वाळपई अग्निशामक दलाच्या तत्काळ हस्तक्षेपामुळे आग आटोक्यात आली. आग लागण्याचे प्राथमिक कारण शॉर्टसर्किट असल्याचा अंदाज व्यक्त करण्यात आला आहे.
शनिवारी सकाळी सुपर मार्केटमध्ये अचानक धूर दिसू लागल्याने कर्मचारी आणि परिसरातील नागरिकांनी तत्काळ आग विझवण्याचा प्रयत्न केला. मात्र, आग वेगाने पसरत असल्याने त्यांचे प्रयत्न पूर्णपणे यशस्वी ठरू शकले नाहीत. यानंतर तातडीने वाळपई अग्निशामक दलाशी संपर्क साधण्यात आला. दलाचे जवान काही मिनिटांत घटनास्थळी दाखल झाले व आगीवर नियंत्रण मिळवत अखेरीस ती पूर्णतः विझवण्यात यशस्वी ठरले.
आगीत सुपर मार्केटमधील अनेक वस्तू जळून खाक झाल्या असून प्रथमदर्शनी हजारो रुपयांचे नुकसान झाल्याचे समोर आले आहे. मात्र, अग्निशामक दलाच्या जलद कारवाईमुळे लाखो रुपयांचे संभाव्य नुकसान टळले.
अग्निशामक दलाच्या अधिकाऱ्यांनी सांगितले की, आग लागल्याची माहिती मिळताच आम्ही तत्काळ घटनास्थळी धाव घेतली. स्थानिक नागरिकांनीही आग विझवण्यासाठी चांगले सहकार्य केले. प्राथमिक अंदाजानुसार शॉर्टसर्किटमुळे आग लागली असावी, परंतु निश्चित कारण शोधण्याचे काम सुरू असल्याचे त्यांनी सांगितले.
