‘यलो अलर्ट’ जारी : अनेक ठिकाणी झाडे पडून नुकसान
पणजी : अरबी समुद्रात तयार झालेला कमी दाबाचा पट्टा तसेच अन्य वातावरणीय कारणांमुळे शनिवारी राज्यात सोसाट्याच्या वाऱ्यासह पावसाने जोरदार हजेरी लावली. राज्यात ठिकठिकाणी झाडे पडून नुकसानीच्या घटना घडल्या. पणजीतील चर्च व्ह्यू इमारतीजवळ दरड कोसळल्याने येथील घरांचे किरकोळ नुकसान झाले. ही घटना पहाटे २.३० च्या सुमारास घडली. वादळी वाऱ्यामुळे श्यामाप्रसाद मुखर्जी स्टेडियम येथे उभारण्यात आलेली सजावट कोसळून पडली. पावसामुळे काही ठिकाणी भात शेतीचे नुकसान झाले.
शनिवारी पहाटे पासूनच पावसाला सुरुवात झाली. पणजीत सकाळी १० पर्यंत पावसाची संततधार सुरू होती. दुपारनंतर अधून मधून पावसाच्या जोरदार सरींनी हजेरी लावली. सततच्या पावसाने शहरातील काही रस्ते पाण्याखाली गेले. हवामान खात्याने राज्यात २५ ते २८ ऑक्टोबर दरम्यान वादळी वाऱ्यासह पावसाची शक्यता व्यक्त केली आहे. यानुसार या चार दिवसांसाठी पावसाचा यलो अलर्ट देण्यात आला आहे. तर २९ ते ३१ ऑक्टोबर दरम्यान तुरळक स्वरूपाच्या पावसाची शक्यता आहे.
राज्यात शनिवारी सकाळी ८.३० पर्यंत सरासरी ३ इंच पावसाची नोंद झाली. ही ऑक्टोबर महिन्यातील सर्वाधिक पावसाची नोंद ठरली. वरील कालावधीत काणकोणमध्ये ५.६० इंच, मुरगावमध्ये ४.१२ इंच पाऊस पडला. राज्यात १ ते २५ ऑक्टोबर दरम्यान सरासरी ७.३० इंच पावसाची नोंद झाली आहे. २५ ते २८ ऑक्टोबर दरम्यान वाऱ्याचा वेग ताशी ३५ ते ५५ किमीपर्यंत पोहोचण्याची शक्यता असल्याने मच्छीमारांनी समुद्रात उतरू नये असे आवाहन हवामान खात्याने केले आहे.
कमी दाबाचा पट्टा पणजीपासून ३८० किमीवर
हवामान खात्याने दिलेल्या माहितीनुसार, अरबी समुद्रात तयार झालेला कमी दाबाचा पट्टा पणजीच्या नैऋत्य दिशेला अरबी समुद्रात ३८० किलोमीटर अंतरावर आहे. हा पट्टा पुढील चोवीस तासात वायव्य दिशेला सरकण्याची शक्यता आहे.
चापोली धरण पुन्हा भरले
परतीच्या पावसामुळे काणकोण येथील चापोली धरण पुन्हा एकदा तुडूंब भरून वाहू लागले. याआधी जुलै महिन्यात चापोली धरण तुडूंब भरून वाहू लागले होते. त्यानंतर धरणातील पाणी कमी झाले होते. मागील दोन दिवस पडलेल्या पावसामुळे धरणाने पुन्हा भरती रेषा ओलांडली आहे.
