पणजी : संपूर्ण सोपस्कार पार पाडूनच कोमुनिदादने केली एमआयआयटीला जमिनीची विक्री

• पणजी: थिवी कोमुनिदादने एमआयआयटी संस्थेला शैक्षणिक संस्था (खासगी विद्यापीठ) स्थापन करण्यासाठी जमीन देण्याचा घेतलेला निर्णय योग्य कायदेशीर सोपस्कार करूनच घेण्यात आला आहे. हे स्पष्ट करत, जमीन देण्याच्या या प्रक्रियेला आव्हान देणारी याचिका गोवा स्थित मुंबई उच्च न्यायालयाने आज फेटाळली. यामुळे थिवी येथे खासगी विद्यापीठ स्थापन करण्याच्या मार्गातील एक मोठा अडसर दूर झाला आहे.

थिवी कोमुनिदादने एमआयआयटी संस्थेला दोन लाख चौरस मीटर (२ लाख चौमी) जमीन १२.५० रुपये प्रति चौरस मीटर दराने दिली होती. ही जमीन देताना योग्य सोपस्कार झालेले नाहीत आणि ती स्वस्त दरात दिली आहे, असा आक्षेप घेत कोमुनिदादच्या सात सदस्यांनी उच्च न्यायालयात आव्हान याचिका दाखल केली होती. उच्च न्यायालयाने या याचिका फेटाळल्या असून, थिवी कोमुनिदादने संपूर्ण प्रक्रिया योग्यरित्या पार पाडूनच जमिनीची एमआयआयटीला विक्री केली आहे, असा स्पष्ट निष्कर्ष नोंदवला आहे.