पणजी : गोवा लोकसेवा आयोगातर्फे (जीपीएससी) राज्य नागरी सेवा कनिष्ठ अधिकाऱ्यांच्या ३८ जागांवर भरती केली जाणार आहे. सर्व जागांसाठी आयोगाच्या संकेस्थळावर ऑनलाईन पद्धतीने अर्ज करण्याची अंतिम मुदत १९ सप्टेंबर पर्यंत आहे. या जागांसाठी उमेदवारांकडून चांगला प्रतिसाद मिळण्याची शक्यता असल्याने जीपीएससीने ६० गुणांची अतिरिक्त पूर्व छाननी परीक्षा घेण्याचा निर्णय घेतला आहे.
एकूण ३८ जागांपैकी ११ ओबीसी, ५ ईडब्ल्यूएस व ६ जागा एसटी समाजाच्या उमेदवारांसाठी राखीव असतील. तर १६ जागा अनारक्षित असणार आहेत. सर्व जागांसाठी वयोमर्यादा ४० वर्षे असून सुधारित मेट्रिक्स लेव्हल १० प्रमाणे वेतन देण्यात येणार आहे. उमेदवाराकडे मान्यताप्राप्त विद्यापीठाची पदवी असणे तसेच कोकणी भाषेचे ज्ञान असणे आवश्यक आहे. नियमानुसार काही उमेदवारांसाठी वयोमर्यादा कमाल ५० वर्षांपर्यंत वाढवण्यात येईल.
पूर्व छाननी परीक्षा ७५ मिनिटांची असणार आहे. यामध्ये उमेदवारांना ६० बहुपर्यायी प्रश्न विचारले जातील. या परीक्षेत अनुत्तीर्ण झालेल्या उमेदवारांना आणखी एकदा परीक्षा देण्याची संधी देण्यात येईल. यासाठी अनुत्तीर्ण उमेदवारांना पुन्हा अर्ज करण्याची गरज नाही. त्यांना आयोगातर्फे या विषयी कळविण्यात येणार आहे. यानंतर पात्र उमेदवारांची ७५ गुणांची सीबीआरटी परीक्षा घेण्यात येईल.
सीबीआरटी मध्ये उत्तीर्ण झालेल्या उमेदवारांची चार टप्प्यात लिखित परीक्षा घेतली जाईल. ही परीक्षा एकूण २५० गुणांची असेल. यामध्ये पात्र ठरलेल्या उमेदवारांना तोंडी परीक्षेसाठी बोलावले जाईल. तोंडी परीक्षा ४० गुणांची असेल. उमेदवारांनी अर्ज भरण्यापूर्वी आयोगाच्या संकेतस्थळावरील सूचना वाचणे आवश्यक आहे. अर्जावर मोबाईल क्रमांक आणि ई-मेल योग्य पद्धतीने लिहिण्याची आवाहन आयोगाने केली आहे.
