शेजारील घराचे नुकसान, ५० हजारांची हानी
म्हापसा : गावसावाडा येथे एका पडीक घराची भिंत शनिवारी (३० ऑगस्ट) दुपारी १२.३० वाजता कोसळून शेजारील प्रसाद केरकर यांच्या घराचे नुकसान झाले. भिंत घराच्या दर्शनी भागावर पडल्याने व्हरांड्यावरील कौलारू छत मोडले. या दुर्घटनेत केरकर यांना सुमारे ५० हजारांचे नुकसान झाले आहे.
घटनेची माहिती मिळताच म्हापसा अग्निशमन दल व उपनगराध्यक्ष प्रकाश भिवशेट घटनास्थळी दाखल झाले. पालिका कर्मचार्यांनी कोसळलेल्या भिंतीची दगडमाती हटवली. भिवशेट यांनी सांगितले की, गेल्या वर्षी या पडीक घराचा काही भाग पालिकेने पाडला होता. केरकर कुटुंबाने उर्वरित भागही कोसळण्याच्या स्थितीत असल्याची तक्रार दिली होती. त्यानुसार पालिकेने अहवाल उपजिल्हाधिकार्यांना पाठवून घर पूर्णपणे पाडण्याची विनंती केली होती; मात्र गणेश चतुर्थी सुट्टी व सततच्या पावसामुळे भिंत आधीच कोसळली. पालिका लवकरच जीर्ण भिंतीचा उर्वरित भाग पाडून संभाव्य धोका दूर करणार असल्याचेही त्यांनी स्पष्ट केले.
