गोव्यात ‘रोटरी रेन रन’ स्पर्धेचा २७ रोजी शुभारंभ

‘रोटरी रेन रन’ च्या आधी अधिकृत पदकांचे अनावरण करताना अविनाश सिंग परमार, हर्ष ठक्कर आणि निखिल शाह.

पणजी : भारतातील सर्वात प्रतिष्ठित मान्सून रनपैकी एक असलेल्या ‘रोटरी रेन रन २०२५’ची ११ वी आवृत्ती येत्या रविवार, २७ जुलै रोजी गोव्यात आयोजित करण्यात येणार आहे. यावर्षीच्या स्पर्धेत लहान मुलांपासून ते ज्येष्ठ नागरिकांपर्यंत २,५०० हून अधिक धावपटू सहभागी होण्याची अपेक्षा आहे, ज्यामुळे राज्यातील ही एक प्रमुख सहनशक्ती स्पर्धा बनली आहे.
रोटरी चॅरिटेबल ट्रस्ट ऑफ पर्वरी, रोटरी क्लब ऑफ पर्वरी आणि रोटरी परिवार यांच्या संयुक्त विद्यमाने आयोजित ‍ही वार्षिक धाव स्पर्धा केवळ धावण्यापुरती मर्यादित नसून, सामाजिक प्रभावाशी जोडलेली आहे. पत्रकार परिषदेत या कार्यक्रमाची अधिकृत घोषणा करण्यात आली. यावेळी यावर्षीच्या आवृत्तीसाठीची अधिकृत जर्सी आणि पदकांचे देखील अनावरण करण्यात आले.
या स्पर्धेत तामिळनाडूचे आरोग्य आणि कुटुंब कल्याण मंत्री सुब्रमण्यम आणि गोव्याचे डीजीपी आलोक कुमार यांची उपस्थिती लक्षवेधी ठरणार आहे. रोटरी रेन रनचे अध्यक्ष, अविनाश सिंग परमार यांनी माध्यमांशी बोलताना सांगितले की, रोटरी रेन रन २०२५ हा केवळ एक फिटनेस इव्हेंट नसून, सामाजिक बदलासाठी एक शक्ती म्हणून वाढत आहे. यावर्षी आम्हाला नवीन सहभागींची साथ मिळणार आहे, ज्यामुळे या कार्यक्रमाचे सामाजिक महत्त्व अधिक बळकट होऊन लोकप्रियता वाढण्यास मदत होईल.
प्रकाश कॅन्सर अॅण्ड प्रोजेक्टचे अध्यक्ष निखिल शाह म्हणाले, दरवर्षी, रोटरी रेन रन महिलांच्या आरोग्याबद्दल आणि प्रकाश कॅन्सर अॅण्ड प्रोजेक्टबद्दल जागरूकता निर्माण करण्यात महत्त्वाची भूमिका बजावत आहे. महिलांमध्ये स्तन आणि गर्भाशयाच्या ग्रीवेचा कर्करोग यांसारखे आजार लवकर आढळल्यास बरे होण्याची शक्यता जास्त असते, ज्यावर प्रकल्प लक्ष केंद्रित करतो.
विविध श्रेणींमध्ये स्पर्धेचे आयोजन
रोटरी रेन रन २०२५ बांबोळी येथील स्पोर्ट्स अथॉरिटी ऑफ गोवा (एसएजी) अ‍ॅथलेटिक्स स्टेडियम येथे सुरू होईल. यात सहभागी दोन किमी फन वॉक, पाच किमी ड्रीम रन, १० किमी वेळेनुसार शर्यत, २१ किमी वेळेनुसार शर्यत आदी विविध श्रेणींमध्ये स्पर्धा करतील.
ज्येष्ठ नागरिक, मुलांसाठी खास सुविधा
या स्पर्धेत ज्येष्ठ नागरिक दोन किमी ज्येष्ठता वॉकमध्ये सहभागी होतील, जो उपक्रम मागील आवृत्तीत सादर करण्यात आला होता. कार्यक्रमस्थळी मुलांना शर्यतीच्या शेवटच्या टप्प्यावर खास तयार केलेल्या फन झोनमध्ये देखील मजा करता येईल.
या शर्यतीतील धावपटू २१ किमी वेळेनुसार मिरामार सर्कल येथे धावतील. बांबोळी आणि दोनापावलामधून एक निसर्गरम्य मार्ग अनुसरण करतील, जिथे गोव्याच्या किनारपट्टी आणि वारसा स्थळांचे विहंगम दृश्ये धावपटूंना अनुभवता येईल. दरम्यान, या शर्यत नोंदणीसाठी २४ जुलैची मुदत देण्यात आली असून सहभागी शर्यत श्रेणींमध्ये भाग घेण्यासाठी https://rotaryrainrun.com/ या संकेतस्थळावर नोंदणी करू शकतात.

धावणे हे केवळ सहनशक्तीबद्दल नाही, ते आरोग्य, उद्देश आणि समुदायाबद्दल आहे. भारत आणि परदेशातून विशेषतः उच्च-प्रोफाईल खेळाडू, अगदी राजकीय नेते आणि नोकरशहा दररोज धावपटूंसोबत खांद्याला खांदा लावून सहभागी होत आहेत हे पाहून आनंद होत आहे. - हर्ष ठक्कर, अध्यक्ष, रोटरी क्लब ऑफ पर्वरी

जागतिक दर्जाची मान्यता
एआयएमएस (असोसिएशन ऑफ इंटरनॅशनल मॅरेथॉन अँड डिस्टन्स रेसेस) च्या सहकार्याने वर्ल्ड अॅथलेटिक्सने प्रमाणित केलेल्या मेजर्ड कोर्समुळे, रोटरी रेन रन आंतरराष्ट्रीय धावपटू आणि हौशी खेळाडूंना आकर्षित करत आहे, ज्यामुळे व्यावसायिकता आणि सामुदायिक सहभागासाठी तिची प्रतिष्ठा वाढली आहे.