वाहन चोरी करण्याचा केला प्रयत्न.
पणजी : कळंगुट येथील ६५ वर्षीय टॅक्सी चालक संजीवन कृष्णा वेंगुर्लेकर यांच्यावर बुधवारी रात्री मालपे-पेडणे परिसरात पाच ते सहा अज्ञात इसमांनी धारदार शस्त्राने प्राणघातक हल्ला केला. या हल्ल्यात ते गंभीर जखमी झाले असून त्यांच्यावर सध्या इस्पितळात उपचार सुरू आहेत.
प्राथमिक माहितीनुसार, संशयित आरोपींनी कळंगुट ते बांद्यापर्यंत भाड्याचे कारण सांगून वेंगुर्लेकर यांची टॅक्सी भाड्याने घेतली. ते संध्याकाळी सुमारे ८.४५ ते ९.०० या दरम्यान मालपे-नाईबाग रस्त्यावरील राष्ट्रीय महामार्ग ६६ वर पोहोचताच, सर्व आरोपींनी वेंगुर्लेकर यांना पकडले व त्यांच्या चेहऱ्यावर, डोक्यावर, खांद्यावर आणि हातावर धारदार शस्त्राने वार केले. आरोपींनी हा हल्ला वेंगुर्लेकर यांची अर्टीगा कार चोरण्याच्या उद्देशाने केला. मात्र, जखमी अवस्थेतही वेंगुर्लेकर यांनी प्रतिकार केला. घटनास्थळी रक्ताने माखलेल्या अवस्थेत सापडलेले चालक वेंगुर्लेकर यांच्यावर सध्या गोमेकॉत उपचार सुरू असून त्यांच्या प्रकृतीवर डॉक्टर लक्ष ठेवून आहेत.
या घटनेनंतर लगेच पेडणे पोलीस स्थानकात गुन्हा दाखल करण्यात आला असून, भा.न्या.सं.च्या ३१०(२), ३११, ३१२ सह ३(५) कलमांतर्गत गुन्हा नोंदवण्यात आला आहे.पेडणे पोलिसांनी घटनास्थळावरून तपास सुरू केला असून एका संशयिताला ताब्यात घेण्यात आले आहे. उर्वरित आरोपींच्या शोधात गोवा पोलिसांची ३ ते ४ तपासपथके महाराष्ट्रात पाठवण्यात आली आहेत, अशी माहिती समोर आली आहे. याप्रकरणी पेडणे पोलीस स्थानकाचे निरीक्षक सचिन लोकरे यांच्या नेतृत्त्वाखाली उपनिरीक्षक विवेक हळर्णकर पुढील तपास करत आहेत.
