पावसाळ्यात गरमागरम अळूवडी खाण्याची मजाच काही और! ही पारंपरिक, चविष्ट आणि कुरकुरीत अळूवडी कशी बनवायची ते पाहूया.
साहित्य:
पाण्याने स्वच्छ धुतलेल्या अळूच्या दोन जुड्या
१ मोठी वाटी बेसन
२ मोठे चमचे तांदळाचे पीठ (वड्या कुरकुरीत होण्यासाठी)
१ चमचा लाल तिखट
अर्धा चमचा हळद
१ मोठा चमचा धने-जिरे पूड
चवीनुसार मीठ
तेल (तळण्यासाठी)
कृती :
प्रथम एका भांड्यात १ मोठी वाटी बेसन, २ मोठे चमचे तांदळाचे पीठ, १ चमचा लाल तिखट, अर्धा चमचा हळद, १ मोठा चमचा धने-जिरे पूड आणि चवीनुसार मीठ घ्या. हे सर्व साहित्य एकत्र करून छान मिसळून घ्या. तुम्ही तुमच्या आवडीनुसार इतर मसालेही घालू शकता. तयार केलेले मिश्रण ४-५ मिनिटे मुरण्यासाठी बाजूला ठेवा. त्यानंतर ते पुन्हा एकदा व्यवस्थित एकत्र करून घ्या. एक अळूचे पान घ्या. त्याचा देठ कापून टाका. पानाचा मागचा भाग घेऊन त्यावर तयार केलेले बेसनचे मिश्रण सर्व बाजूंनी पातळ थरात लावून घ्या. या पानावर दुसरे अळूचे पान ठेवून त्यावरही मिश्रण लावा. ही प्रक्रिया तुम्हाला हवी तितक्या वेळा करू शकता, पण किमान ४-५ पाने एकावर एक ठेवून मिश्रण लावावे. आता पानाचे शेवटचे टोक घेऊन पानाची घट्ट वळकुटी (रोल) करा. वळकुटी करताना मध्ये-मध्ये बेसनचे मिश्रण लावत रहा. वळकुटी खूप घट्ट करू नका, शक्य तितकी हलक्या हाताने करा. जास्त घट्ट केल्यास तळताना आतमध्ये कच्ची राहण्याची शक्यता असते. तयार केलेल्या अळूच्या वळकुट्या इडलीच्या भांड्यात साधारण १५ ते २० मिनिटे वाफवून घ्या. अळूवडी शिजल्यानंतर थंड होऊ द्या. त्यानंतर तुम्हाला हव्या त्या आकारात वडी कापून घ्या. कापलेल्या वड्या तेलात कुरकुरीत होईपर्यंत भाजून घ्या.
टीप: जर तुम्हाला तेलात भाजायचे नसेल, तर वाफवूनही गरम गरम खाऊ शकता. ही अळूवडी पावसाळ्यात खूप छान लागते. पूर्वीच्या काळी ही अळूवडी मोठ्या प्रमाणात बनवली जात असे. तर या पावसाळ्यात ही चमचमीत अळूवडी नक्की करून पहा आणि तुमच्या कुटुंबाला खायला घालून आनंदित करा!
संचिता केळकर
