पतीच्या रागाचा कडेलोट : पोलिसांना शरण
पतीने पत्नीच्या डोक्यात दगड घालून हत्या केली. चेतन गावकरने पोलिसांसमोर शरणागती पत्करली.
फोंडा : शिरोडा येथील तळपण भागात एका अत्यंत धक्कादायक घटनेत पतीने आपल्या पत्नीची डोक्यात दगड घालून हत्या केली. चेतन गावकर आणि त्याची पत्नी हेमा गावकर हे तळपण, शिरोडा येथे नवीन घर बांधून राहत होते.
चेतन फोंडा अतिरिक्त जिल्हाधिकारी कार्यालयात कार्यरत असून, त्याची पत्नी हेमा फर्मागुडी येथील एका शाळेत शिक्षिका म्हणून काम करत होती.
गेल्या काही दिवसांपासून दोघांमध्ये कोणत्यातरी कारणावरून वाद सुरू होते. घरात त्यांची कडाक्याची भांडणे व्हायची. शनिवारी (३१ मे) त्यांच्यात कोणत्यातरी विषयावरून जोरदार वाद निर्माण झाला आणि राग अनावर झाल्याने चेतनने एक मोठा दगड आणून तो हेमाच्या डोक्यात घातला.
"डोक्यात दगड पडताच हेमाचे डोके छिन्नविछिन्न झाले आणि संपूर्ण हॉलमध्ये रक्त सांडले."
आपल्या हातून खून झाल्याचे लक्षात येताच चेतनने तत्काळ पोलीस ठाणे गाठले आणि तो पोलिसांना शरण गेला. त्याने पोलिसांना खुनाचे नेमके कारण आणि घडलेली संपूर्ण माहिती दिली.
घटनास्थळी पोलीस दाखल झाले. माहिती मिळताच पोलिसांची एक टीम लगेचच शिरोडा येथील घटनास्थळी दाखल झाली. ही खुनाची घटना सुमारे सायंकाळी साडेसहाच्या सुमारास घडली असावी, असा पोलिसांचा अंदाज आहे.
खून झाला त्यावेळी त्यांचा तीन वर्षांचा मुलगा घरात नव्हता.
पोलिसांनी घटनास्थळाचा पंचनामा केला असून, पुढील तपास सुरू केला आहे.
हेमाचे माहेर तळेवाडा, बेतोडा येथे आहे. या खुनाच्या प्रकाराने दोन्ही गावांमध्ये हळहळ व्यक्त केली जात आहे.
"लोक सांगतात त्याप्रमाणे चेतन हा शांत स्वभावाचा होता आणि तो असे कृत्य करेल यावर लोकांचा विश्वास बसत नाही आहे."
