मुख्यमंत्री डॉ. सावंत घेणार पुढील निर्णय
पणजी : कला अकादमी कृती दलाने सादर केलेल्या अहवालात सुधारणांनंतर कला अकादमीच्या १८ ते २० भागांमध्ये त्रुटी आढळून आल्या. गुरुवारी कृती दलाने मुख्यमंत्री डॉ. प्रमोद सावंत यांची भेट घेतली. प्रमोद सावंत यांना अहवाल सादर करण्यात आला. मुख्यमंत्री सार्वजनिक बांधकाम खात्याशी अहवालावर चर्चा करतील आणि पुढील निर्णय घेतील, अशी माहिती कृती
पथकाचे अध्यक्ष विजय केंकरे यांनी दिली.
कला अकादमीच्या दुरुस्ती आणि नूतनीकरणासाठी सरकारने ७० कोटी रुपयांहून अधिक खर्च केला. बहुतेक कलाकारांनी दुरुस्ती तसेच नूतनीकरणाच्या कामाबद्दल शंका व्यक्त केल्या आहेत. आवाज आणि प्रकाश व्यवस्था दोन्हीही सदोष आहेत. यानंतर, मुख्यमंत्र्यांनी कृती दलाची स्थापना केली होती.
विजय केंकरे हे कृती दलाचे अध्यक्ष आहेत. कृती दलाने कला अकादमीच्या कामाची पाहणी केली आणि बैठकीत त्यावर चर्चा केली. त्यांनी कंत्राटदारांकडून स्पष्टीकरणही मागितले. नूतनीकरणासाठी केलेले काम दर्जाहीन होते असे मत अध्यक्ष विजय केंकरे यांनी व्यक्त केले होते. गुरुवारी कृती दलाची बैठक झाली व यानंतर अहवाल सादर करण्यात आला.
