पिळर्ण येथे 'अक्षय पात्र'च्या मध्यवर्ती स्वयंपाकघराचे उद्घाटन
पणजी: सरकारने भविष्यात तुरूंग आणि रुग्णालयांमध्ये 'अक्षयपात्र'चे अन्न पुरवण्याचा प्रस्ताव ठेवला आहे. तसेच माध्यान्ह आहार पुरवणारे स्वयंसेवी गट बंद केले जाणार नाहीत किंवा त्यांची संख्या देखील वाढवली जाणार नाही, फक्त त्यांना चांगल्या दर्जाचे अन्न द्यावे. माध्यान्ह आहारासाठी अक्षयपात्र सोबत सरकारची भागीदारी चालू राहील, असे मुख्यमंत्री डॉ. प्रमोद सावंत यांनी सांगितले.
मुख्यमंत्री डॉ. प्रमोद सावंत यांनी पिळर्ण अक्षय पात्राच्या स्वयंपाक घराचे उद्घाटन केले, त्याप्रसंगी ते बोलत होते. यावेळी स्थानिक आमदार केदार नाईक, अक्षय पात्र फाउंडेशनचे उपाध्यक्ष चंचलापती दास, शिक्षण सचिव प्रसाद लोलयेकर, शिक्षण संचालक शैलेश झिंगडे आणि इतर मान्यवर उपस्थित होते. अक्षय पात्र हे मनोहर पर्रिकर यांचे स्वप्न त्यांच्या पुण्यतिथीनिमित्त पूर्ण होत आहे याचा मला आनंद होत असल्याचे मुख्यमंत्री डॉ. प्रमोद सावंत म्हणाले.
चांगल्या दर्जाचे जेवण मिळावे म्हणून २०१४ मध्ये अक्षय पात्र योजना सुरू करण्यात आली होती. पण ते सुरू व्हायला दहा वर्षे लागली. अक्षय पात्र केंद्राजवळील साळगाव, कळंगुट आणि शिवोली मतदारसंघातील इयत्ता नववी ते दहावीच्या ५ हजार मुलांना माध्यान्ह आहार देत होते. त्यामुळे अन्नपुरवठा करणाऱ्या सध्याच्या बचत गटांचे काम थांबवले जाणार नाही, असे आश्वासन मुख्यमंत्र्यांनी दिले.
घरगुती कार्यक्रमांसाठी देखील 'अक्षय पात्र' उपयुक्त
अक्षय पात्राचा माध्यान्ह आहार घेणारे विद्यार्थी भाग्यवान आहेत. भविष्यात, माध्यान्ह जेवणाव्यतिरिक्त, अक्षय पात्र देखील शाळांमध्ये दुपारच्या जेवणासाठी वितरित केले जाईल. याशिवाय, 'अक्षय पात्र'कडे असलेल्या मोकळ्या वेळेत तुरूंग आणि रुग्णालयांमध्ये अन्न पुरवठा करण्याचा प्रस्ताव सरकारने ठेवला आहे. तसेच लोक त्यांच्या घरगुती कार्यक्रमांमध्ये किंवा लग्नसमारंभातदेखील 'अक्षय पात्र'मधून जेवण मागवू शकतात, असे मुख्यमंत्री म्हणाले.
