राय येथील घटनेने खळबळ : १. १० लाखांचा मुद्देमाल चोरीला
मडगाव : राय परिसरातील टेंबी येथे सुषमा शिरोडकर या बस स्टॉपवर गाडीची वाट पाहत होत्या. दुचाकीवरुन आलेल्या दोघा चोरांनी शिरोडकर यांच्या गळ्यातील मंगळसूत्र हिसकावून घेत पलायन केले. या चोरीप्रकरणी गुन्हा नोंद करण्यात आला असून मायना कुडतरी पोलीस याचा तपास करत आहेत.
मिळालेल्या माहितीनुसार, टेंबी राय येथील बस स्टॉपवर ही घटना १० मार्च रोजी घडलेली आहे. सुषमा शिरोडकर या एका बँकेत शाखा व्यवस्थापक म्हणून कार्यरत आहेत. सोमवारी सकाळी नऊ वाजण्याच्या सुमारास शिरोडकर या कामानिमित्ताने जाण्यासाठी बसस्टॉपवर बसची वाट पाहत होत्या. त्याचवेळी रॉयल एनफिल्ड बुलेट घेऊन आलेल्या दोन अनोळखी व्यक्तींनी शिरोडकर यांच्या गळ्यातील मंगळसूत्र खेचत पळ काढला.
शिरोडकर यांनी मदतीसाठी आरडाओरड केली पण तोपर्यंत बुलेटवरील दोघे चोर पसार झाले होते. या चोरी केलेल्या मंगळसूत्राची किंमत सुमारे १.१० लाख एवढी आहे. याप्रकरणी सुषमा शिरोडकर यांनी मायना कुडतरी पोलीस ठाण्यात तक्रार दाखल केली. त्यानुसार पोलिसांनी अज्ञात चोरट्यांविरोधात गुन्हा नोंद केलेला आहे. मायना कुडतरी पोलीस निरीक्षक अरुण गावस देसाई यांच्या मार्गदर्शनाखाली पोलिस उपनिरीक्षक वेरोनिता कुतिन्हो याप्रकरणी पुढील तपास करत आहेत.
