रेल्वे आणि बस सेवा बंद, दहशतवादी हल्ल्याची भीती
तेल अविव : गुरुवारी रात्री इस्रायलमध्ये एक मोठी घटना घडली. राजधानी तेल अवीवमध्ये तीन बसेसमध्ये झालेल्या एकामागून एक मोठ्या स्फोटांमुळे खळबळ उडाली.अन्य दोन बसमध्येही बॉम्ब सापडले. या स्फोटात कोणत्याही प्रकारची जीवितहानी झाल्याचे वृत्त नाही.
इस्रायली पोलिसांनी दहशतवादी हल्ल्याची भीती व्यक्त केली आहे. पंतप्रधान बेंजामिन नेतान्याहू प्रत्येक क्षणाचे अपडेट घेत आहेत. आम्ही घटनांवर बारकाईने लक्ष ठेवून आहोत. स्फोटानंतर देशभरातील रेल्वे आणि बस सेवा बंद करण्यात आल्या आहेत, असे त्यांनी जनतेला संबोधन करताना म्हटले.
दरम्यान तेल अवीवमधील बस स्फोटाचा व्हिडिओ सोशल मीडियावर व्हायरल होत आहे. पार्किंगमध्ये उभ्या असलेल्या बसमध्ये अचानक स्फोट झाल्याचे व्हिडिओमध्ये दिसत आहे. काही अहवालांमध्ये असे म्हटले आहे की या उपकरणांवर रिव्हेंज थ्रेट लिहिलेले होते. सरगारोव्ह म्हणाले की, हल्ल्यात किती लोक सामील होते? ते अद्याप कळलेले नाही.
बॉम्बस्फोट झाल्यानंतर वाहतूक मंत्री मिरी रेगेव्ह यांनी स्फोटक उपकरणांची तपासणी करण्यासाठी देशभरातील सर्व बस, ट्रेन आणि हलक्या रेल्वे सेवा थांबवल्या आहेत . इस्रायलचे संरक्षण मंत्री काट्झ यांनी आयडीएफला वेस्ट बँकमधील निर्वासित छावण्यांमध्ये त्यांच्या हालचाली वाढवण्याचे आदेश दिले आहेत. हल्ल्यांचा तपास करण्यासाठी आयडीएफ आणि शिन बॅट एकत्र काम करत आहेत.
इस्रायली पोलिसांच्या मते, एकूण ५ बॉम्ब एकसारखे होते. सर्व टायमरने सुसज्ज होते. बॉम्बशोधक पथकाने निकामी केलेले बॉम्ब सुरक्षितपणे काढून टाकले आहेत. कोणालाही दुखापत झाली नाही हा एक चमत्कार होता. बसेसनी त्यांचा प्रवास पूर्ण केला होता आणि त्या पार्किंगमध्ये होत्या. टाईम्स ऑफ इस्रायलने वृत्त दिले आहे की, शुक्रवारी सकाळी बॉम्बस्फोटांचे नियोजन होते. पण टायमर चुकीच्या पद्धतीने सेट केल्यामुळे गुरुवारी रात्रीच स्फोट झाला. या स्फोटानंतर, नेतान्याहू यांनी इस्रायल संरक्षण दलांना वेस्ट बँकमधील दहशतवादी अड्ड्यांविरुद्ध मोठ्या प्रमाणात कारवाई करण्याचे आदेश दिले आहेत.
