कल्याणी नंद गिरी यांची गाडी वाटेत अडवून आशीर्वाद घेण्याच्या बहाण्याने त्यांच्यावर केले चाकूने वार, दागिनेही लुटले
प्रयागराज : प्रयागराज महाकुंभात एक मोठी घटना घडली आहे. काल गुरुवारी १३ फेब्रुवारी रोजी रात्री किन्नर आखाड्यातील महामंडलेश्वर कल्याणी नंद गिरी उर्फ छोटी माँ यांच्यावर हल्ला झाला. आशीर्वाद घेण्याच्या बहाण्याने ६-७ जणांनी गाडी थांबवली आणि चाकूने हल्ला केला. बचावासाठी आलेले तीन शिष्यही जखमी झाले. हल्ल्यानंतर त्यांनी दागिनेही लुटले. माहिती मिळताच पोलीस घटनास्थळी पोहोचले. रात्री उशिरा सर्वांना महाकुंभ नगरच्या सेंट्रल हॉस्पिटलमध्ये दाखल करण्यात आले. प्रकरण मुख्यमंत्री योगी आदित्यनाथ यांच्याकडे पोहोचल्यानंतर त्यांनी पोलिसांना दोषींवर कडक कारवाईचे निर्देश दिले आहेत.
मिळालेल्या माहितीनुसार, महामंडलेश्वर कल्याणीनंद गिरी गुरुवारी रात्री उशिरा सेक्टर १६ मधील किन्नर आखाड्यातून बाहेर पडल्या आणि फॉर्च्युनर कारने सादियापूर येथील त्यांच्या घरी जात होत्या. संगम लोअर रोडवर, ६-७ जणांनी कल्याणीनंद यांची गाडी आशीर्वाद घेण्यासाठी थांबवली. महामंडलेश्वर कल्याणीनंद यांनी गाडी थांबवली तेव्हा दोन लोकांनी त्यांना नमस्कार केला. त्यानंतर अचानक ६-७ जण आले आणि त्यांनी धारदार शस्त्रांनी हल्ला केला. हल्लेखोरांनी त्यांना वाचवण्यासाठी आलेल्या त्यांच्या तीन शिष्यांवरही चाकूने वार केले. हल्ल्यानंतर, दागिने लुटून गुन्हेगार पळून गेले.
हल्ल्याची माहिती मिळताच किन्नर आखाड्यात गोंधळ उडाला. काही वेळातच अनेक शिष्य आणि संत त्या ठिकाणी पोहोचले. महामंडलेश्वर कल्याणीनंद आणि त्यांच्या शिष्यांना उपचारासाठी महाकुंभाच्या मध्यवर्ती रुग्णालयात दाखल करण्यात आले. कल्याणीनंद यांच्यासह सर्व जखमी शिष्यांची चौकशी करण्यात आली. पोलिसांनी गुन्हेगारांचा शोध सुरू केला आहे. कल्याणीनंद गिरी यांच्यावर हल्ला करण्याचा पूर्वनियोजित कट रचण्यात आल्याचे प्राथमिक तपासात उघड झाले आहे. हल्लेखोर आधीच वाटेत दबा धरून बसले होते.
९ फेब्रुवारी रोजी किन्नर आखाड्यातील जगद्गुरु हिमांशी सखीवरही हल्ला झाला होता. हिमांशी सखी यांनी आचार्य महामंडलेश्वर डॉ. लक्ष्मी नारायण त्रिपाठी, कौशल्या नंद गिरी आणि कल्याणी नंद गिरी यांच्यावर मारहाण केल्याचा आरोप केला होता. गुरुवारी कल्याणी नंद गिरी यांच्यावर झालेल्या हल्ल्यामागे सध्या सुरू असलेला वाद देखील एक कारण असल्याचे मानले जात आहे. सध्या पोलीस सर्व बाजूंनी या प्रकरणाचा तपास करत आहेत. चौकशीनंतर खरे कारण समोर येईल.
