पत्र लिहून समस्या कळवा; मुख्यमंत्र्यांचे आवाहन
पणजीः सरकारला माजी आमदारांच्या मार्गदर्शनाची आवश्यकता असते. म्हणून माजी आमदारांनी त्यांचे विचार मला पत्र लिहून कळवावेत, सरकार त्यांच्या सूचना योग्य विभागाकडे पाठवेल. म्हादई आणि हरित गोवा या मुद्द्यांवर सरकार तातडीने काम करेल असेही मुख्यमंत्री डॉ. प्रमोद सावंत यांनी सांगितले.
पर्वरी रोजी गोवा विधानसभेत गोवा विधिकार दिन साजरा करण्यात आला. या कार्यक्रमात उपस्थित असलेल्या माजी आणि विद्यमान आमदारांना मुख्यमंत्र्यांनी संबोधित केले. सभापती रमेश तवडकर, विरोधी पक्षनेते युरी आलेमाव, माजी आमदार तसेच गोवा विधिकार फोरमचे सदस्य व्हिक्टर फर्नांडिस, मोहन आमशेकर आणि इतर मान्यवर उपस्थित होते.
यावेळी बोलताना मुख्यमंत्री म्हणाले की, दरवर्षी आपण एका दिवसासाठी एका व्यासपीठावर एकत्र येतो, त्यामुळे आपण या दिवसाला अधिक महत्त्व दिले पाहिजे. मी आमदार असताना दोनदा या कार्यक्रमाला उपस्थित राहू शकलो नाही, पण सभापतीपासून ते आत्तापर्यंत या कार्यक्रमाला हजर राहतो.
तुमच्या सर्व माजी आमदारांचे मार्गदर्शन आवश्यक आहे. माजी आणि विद्यमान आमदारांनी म्हादई आणि हरित गोव्याचे मुद्दे उपस्थित केले. पण सरकार म्हादई आणि हरित गोवा यावर विविध सुधारणा आणि आर्थिक तरतुदींद्वारे १०० टक्के काम करत असल्याचे मुख्यमंत्र्यांनी सांगितले.
माजी आमदारांनी माझ्याशी पत्राद्वारे व्यवहार करावा. माजी आमदार शंभूभाऊ बांदेकर मला विविध मुद्द्यांवर पत्रे लिहित आहेत. इतर माजी आमदारांनीही त्यांच्या लक्षात येणाऱ्या कोणत्याही समस्यांबद्दल लिहावे. मी स्वतः त्याची दखल घेऊन संबंधित विभागाकडे निराकरणासाठी पाठवीन, असे त्यांनी सांगितले.
पंतप्रधान नरेंद्र मोदी यांच्या विकसित भारत २०४७ च्या उद्दिष्टाच्या अनुषंगाने, मुख्यमंत्री प्रमोद यांनी स्वयंपूर्ण गोवा ही संकल्पना राबवली आहे. परंतु केवळ मुख्यमंत्रीच हे ध्येय साध्य करतील असे न समजता, सर्व माजी- विद्यमान आमदार, मंत्री आणि अगदी विरोधी पक्षांनीही जबाबदारी घ्यावी, असे आवाहन सभापती रमेश तवडकर यांनी केले.
आपण विकसित भारत, विकसित गोवा याबद्दल बोलतो पण जर तुम्ही म्हादई, कॅसिनो आणि गोवा विकणे यासारख्या मुद्द्यांकडे पाहिले तर गोवा २०४७ पर्यंत टिकेल का, असा विचार माजी आमदारांनी त्यांच्या अनुभवातून करावा, असे आवाहन विरोधी पक्षनेते युरी आलेमाव यांनी केले.
निवृत्त आमदारांनी विकासात योगदान द्यावेः तवडकर
जर एखादा प्रश्न सोडवण्यात सरकार चुकत असेल तर त्याकामी सरकारला मार्गदर्शक म्हणून विरोधी पक्ष नेत्यांनी भूमिका बजावली पाहिजे. विरोधी पक्ष आणि सत्ताधारी पक्षाचे काम तितकेच महत्त्वाचे आहे. जे आमदार निवृत्त झाले आहेत त्यांनी गोव्याच्या विकासात योगदान द्यावे असे आवाहन तवडकर यांनी केले.
माजी आमदारांचा सन्मान
१९८९ ते १९९४ दरम्यान सेवा दिलेल्या आमदारांचा मुख्यमंत्री प्रमोद सावंत यांच्या हस्ते सन्मान करण्यात आला. त्यामध्ये सांताक्रूझचे काँग्रेसचे व्हिक्टर गोन्साल्वीस, सांत आंद्रे अपक्ष आमदार डॉ. कार्लो पेजाद, कुंभारजुवे येथील मगोचे धर्मा चोडणकर, कालयचे आमदार विनय कुमार उसगावकर, वेळ्ळीची आमदार फेरेल फुतार्दो, सावर्डे येथील मगोचे मोहन आमशेकर, कुडचड येथील काँग्रेसचे डोमिनिक फर्नांडिस आणि लोटलीचे अपक्ष आमदार राधाराव ग्रासियास यांचा सन्मान करण्यात आला.
