वीज साठवून ठेवण्यासाठी थर्मल बॅटरी तयार करण्याचा विचार
पणजी : गोव्यात पवनचक्कीच्या आधाराने १०० मेगावॅट वीज निर्मिती करण्याचा प्रस्ताव आहे. याविषयी निविदा जारी करण्यात आल्याची माहिती वीजमंत्री सुदिन ढवळीकर यांनी दिली. पीक अवरच्या गरजा पूर्ण करण्यासाठी वीज साठवणाऱ्या स्टोरेज बॅटरी तयार करण्याचा प्रस्ताव आहे.
मुंबईत अक्षय ऊर्जेवर आधारित कार्यशाळा आयोजित करण्यात आली होती. कार्यशाळेत बोलताना वीजमंत्री सुदिन ढवळीकर यांनी ही माहिती दिली. या कार्यशाळेत केंद्रीय वीज राज्यमंत्री श्रीपाद नाईक आणि केंद्रीय ऊर्जा मंत्री प्रल्हाद जोशी उपस्थित होते.
गोवा सरकार हरित ऊर्जेच्या विकासाला प्राधान्य देते. याचाच एक भाग म्हणून, पवनचक्क्यांवर आधारित वीज निर्मिती करण्याचे प्रयत्न सुरू आहेत. वीज साठवण्यासाठी दोन प्रकारच्या स्टोरेज बॅटरी विकसित करण्याचा प्रस्ताव आहे. ही बॅटरी ४ ते ५ तास वीज साठवून ठेवेल, अशाप्रकारे डिझाइन केली जाईल. १० ते १२ तास वीज साठवणूक करू शकणारी कार्बन डायऑक्साइड-आधारित थर्मल बॅटरी तयार करण्याचेही प्रयत्न सुरू आहेत.
पंतप्रधान नरेंद्र मोदी यांनी जाहीर केलेली पंतप्रधान सूर्यघर मुफ्त बिजली योजना आता सुरू झाली आहे. या योजनेअंतर्गत, घरी वीज निर्मितीसाठी ७८ हजार रुपयांपर्यंत ३ किलोवॅट क्षमतेचे सौर छप्पर बसवता येते. २०२७ पर्यंत, ६५ मेगावॅट वीज तयार करण्यासाठी २१,२०० सौर छप्पर बसवण्याची योजना आहे. सौर छतावरील प्लॅटफॉर्म बसविण्यासाठी ४,५०० अर्ज प्राप्त झाले आहेत. यापैकी ४७७ सौर छप्पर बसवण्यात आले आहेत, असे वीज मंत्री सुदिन ढवळीकर यांनी सांगितले.
हरित ऊर्जेचा वापर वाढवण्यासाठी प्रयत्न
हरित ऊर्जेचा वापर वाढवण्यासाठी मार्च २०२६ पर्यंत ७.५ अश्वशक्तीचे ९०० सौर पंप शेतकऱ्यांना पुरवण्याचे उद्दिष्ट आहे. या योजनेअंतर्गत आतापर्यंत ३५० अर्ज प्राप्त झाले आहेत. यापैकी ९० पंप बसवून झाले आहेत. शेतकरी तसेच शेतकरी संघटना सौर पंप योजनेसाठी पात्र आहेत.
