आत्महत्या करण्यापूर्वी बनवला एक व्हिडिओ, घटस्फोट आणि व्यवसायाबाबत पत्नीशी होता वाद
नवी दिल्ली : दिल्लीतील मॉडेल टाऊनमध्ये राहणाऱ्या एका कॅफे मालकाने मंगळवारी गळफास लावून आत्महत्या केली. पोलिसांनी दिलेल्या माहितीनुसार, ४० वर्षीय पुनीत खुराना त्यांच्या घरात बेशुद्धावस्थेत आढळून आले. त्यांना बीजेआरएम रुग्णालयात दाखल करण्यात आले. येथे डॉक्टरांनी त्याला मृत घोषित केले.
पुनीतच्या कुटुंबीयांनी पुनीतची पत्नी आणि सासरच्या मंडळींवर छळ केल्याचा आरोप केला आहे. तर पुनीतचा फोन पोलिसांनी ताब्यात घेतला आहे. आज गुरुवारी शवविच्छेदन करण्यात येणार असल्याचे पोलिसांनी सांगितले. पुनीत आणि त्यांची पत्नी घटस्फोट घेणार होते. दोघांमध्ये कॅफेबाबत वादही सुरू होता. पत्नी आणि सासरच्या त्रासाला कंटाळून पुनीतने मृत्यूपूर्वी एक व्हिडिओही रेकॉर्ड केला, जो सध्या पोलिसांकडे आहे.
पुनीतचे २०१६ मध्ये लग्न झाले होते. सुमारे ५९ मिनिटांच्या व्हिडिओमध्ये पुनीत याने आपल्यावर झालेल्या अत्याचाराचा पढा वाचला आहे. पोलिसांनी पुनीत खुराना यांचा फोन जप्त केला असून त्यांच्या पत्नीला चौकशीसाठी बोलावले आहे. पैशाच्या व्यवहारावरून तसेच मालमत्तेवरून दोघांमध्ये मतभेद झाल्याचे पुनीतच्या आईने सांगितले आहे.
पुनीतच्या आत्महत्येची तुलना बेंगळुरूचे तांत्रिक अभियंता अतुल सुभाष यांच्या आत्महत्येशी केली जात आहे. अतुलने डिसेंबरमध्ये आत्महत्या केली. त्याने २४ पानांची सुसाइड नोट सोडली, ज्यामध्ये त्याने पत्नी आणि तिच्या नातेवाईकांवर छळ केल्याचा आरोप केला होता. व्हायरल झालेल्या शेवटच्या व्हिडिओनुसार, अतुलने पत्नी निकिता आणि तिच्या कुटुंबीयांमुळे आत्महत्या केली. सध्या तिघेही बेंगळुरू पोलिसांच्या ताब्यात आहेत.
बेंगळुरूमध्ये निकिताविरुद्ध ३०६ (आत्महत्येसाठी प्रवृत्त) गुन्हा दाखल करण्यात आला आहे. अतुल आणि निकिता यांच्या मुलाशी संबंधित एका प्रकरणात १२ जानेवारी २०२५ रोजी सुनावणी आहे. तर हुंडाबळी आणि हिंसाचाराच्या दुसऱ्या प्रकरणाची पुढील तारीख २९ जानेवारी २०२५ आहे.
