शिमला : नाताळ सणाची सुट्टी आणि नववर्षाच्या स्वागतासाठी अनेकजण गोवा किंवा हिमाचल प्रदेशमध्ये जाण्याचा बेत आखत आहेत. हिमाचलमध्ये यंदा मोठ्याप्रमाणात बर्फवृष्टी होत आहे आणि यामुळे येथील एकंदरीत वाहतुकीवर देखील मोठा ठाण पडला आहे. दरम्यान येथूनच एक धक्कादायक बातमी समोर आली आहे. सुट्टीनिमित्त फिरायला गेलेल्या एका मुंबईकर पर्यटक महिलेचा हिमाचल प्रदेशमध्ये अपघातात दुर्दैवी मृत्यू झाला आहे.
मंडी येथील घाटरस्त्यात मोठी दरड कारवर कोसळून झालेल्या अपघातात मुंबईस्थित महिलेचा जागीच मृत्यू झाला, तर कारमध्ये असलेले अन्य दोघे प्रवासी गंभीर जखमी झाले. ते मनाली येथे पर्यटनाचा आनंद घेऊन मुंबईच्या दिशेने माघारी येत होते. जखमींना जवळच्या रुग्णालयात उपचारासाठी दाखल केले आहे. त्यांचीही प्रकृती सध्या चिंताजनक असल्याचे समजते.
ज्या ठिकाणी अपघात घडला, त्या परिसरात बांधकाम सुरू होते. याचदरम्यान एका वळणावर कार आली असता, दरडीतून घरंगळत एक मोठा दगड अचानक कारवर कोसळला. यात कारचे प्रचंड नुकसान झाले. कारच्या उजव्या बाजूला दगड कोसळला व आघाताने पर्यटक महिलेला प्राण गमवावा लागला. अन्य दोघांनाही गंभीर दुखापत झाली. मंडी जिल्ह्यातील जंझेली भागातही मागे अशाच प्रकारची घटना घडली होती. त्यात तीन वाहनांचे नुकसान झाले. मात्र त्यावेळी सुदैवाने कोणतीही जीवितहानी झाली नाही.
