एक तरुण गंभीर जखमी. अधिक उपचारासाठी करण्यात आले गोमेकॉत दाखल
दोडामार्ग : तेरवण-मेढे येथील एका वळणावर गोवा नोंदणीकृत चारचाकी व एक बुलेटची समोरासमोर टक्कर झाली. यात हेवाळे येथील एक तरुण गंभीर जखमी झाल्याची माहिती समोर आली आहे. सदर घटना काल शनिवारी सकाळी घडली. जखमी तरूणास गोमेकॉत उपचारासाठी दाखल करण्यात आले आहे.
प्राप्त माहितीनुसार, गोव्यातील काही जण चारचाकीने विजघरच्या दिशेने जात होते. तर हेवाळेतील एक युवक बुलेटने साटेली भेडशीच्या दिशेने येत होता. दरम्यान दोडामार्ग ते विजघर मार्गावरील तेरवण-मेढे परिसरात एका अवघड वळणावर सदर चारचाकी व बुलेटची जोरदार धडक झाली. यात युवकाच्या हाता-पायाला गंभीर दुखापत झाली.
येथील ग्रामस्थांनी व येथून मार्गस्थ होणाऱ्यांनी पुढे येत अपघातग्रस्तांना मदत केली. दरम्यान जखमी युवकाला उपचारासाठी गोव्यातील गोमेकॉत पाठवण्यात आले. या अपघातामुळे चारचाकी व बुलेटचे मोठ्या प्रमाणात नुकसान झाले आहे. येथे काहीवेळ वाहतुकही ठप्प झाली होती.
