पणजी : गोवा स्थित बॉक्सर कैलास गावस आणि प्रल्हाद पांडा यांनी सुसेगादो स्ट्राइक फाईट नाईटमध्ये आपली कौशल्यपूर्ण कामगिरी दाखवत प्रतिस्पर्ध्यांचा पराभव करत शानदार विजय मिळवला. ही रोमांचक बॉक्सिंग स्पर्धा दोनापावला येथे आयोजित करण्यात आली होती.
चिंबलच्या ३० वर्षीय बॉक्सर कैलास गावसने आपल्या पदार्पणाच्या लढतीत शानदार प्रदर्शन करत तामिळनाडूच्या संजय एसचा पहिल्याच फेरीत नॉकआउटने पराभव केला. त्याच्या आक्रमक फटकेबाजीने प्रेक्षकांना थक्क केले. सुपर फ्लायवेट गटातील या लढतीत कैलासने अवघ्या १.५० मिनिटांत संजयच्या बचावाला भेदून स्पर्धा आपल्या नावावर केली, ज्यामुळे त्याच्या कौशल्याची चुणूक सर्वांना पाहायला मिळाली.
म्हापसाच्या २८ वर्षीय प्रल्हाद पांडाला रिंगमध्ये संयमाने खेळ करण्याची गरज भासली, परंतु अखेरीस त्याने आपल्या तामिळनाडूतील प्रतिस्पर्धी राधिवर्मनचा फेदरवेटच्या पहिल्या फेरीत पराभव केला. प्रल्हाद, जो वैयक्तिक प्रशिक्षक म्हणून कार्यरत आहे, गेल्या काही महिन्यांपासून या स्पर्धेसाठी कठोर प्रशिक्षण घेत होता. त्याच्या मेहनतीचा आणि तयारीचा प्रत्यय त्याच्या प्रभावी कामगिरीतून दिसून आले.
उत्तर प्रदेश, तामिळनाडू, तेलंगणा, केरळ, हरियाणा आणि मध्य प्रदेशातील प्रतिभावान स्पर्धकांप्रमाणेच गोव्याच्या म्हापसा येथील कैलास गावस आणि प्रल्हाद पांडानेही आपल्या जोशपूर्ण कामगिरीने प्रेक्षकांची वाहवा मिळवली. फेदरवेटपासून क्रूझरवेटपर्यंत (५२ किलो ते ९० किलोपेक्षा जास्त) विविध वजनी गटांमध्ये त्यांनी आपली कौशल्यपूर्ण कामगिरी सादर करत ठसा उमटवला. या कार्यक्रमाची आणखी एक वैशिष्ट्यपूर्ण बाब म्हणजे दोन महिला बॉक्सर्सचा सहभाग, ज्यामुळे या स्पर्धेने सर्वसमावेशकतेचा आदर्श प्रस्तुत केला.
महिला बॉक्सर्सच्या एकमेव लढतीत, हरियाणातील हिसार येथील राज साहिबाने सुपर लाइटवेट गटात मध्य प्रदेशातील इंदूरच्या मुस्कान श्रीवास्तवचा तीन फेऱ्यांमध्ये सहज पराभव केला.
स्पर्धेतील इतर गटातील निकाल
इतर लढतींमध्ये तामिळनाडूच्या अश्विन व्हीने वेल्टरवेट गटात सहा फेऱ्यांमध्ये केरळच्या उमर रिनोशचा पराभव केला, तर हरियाणाच्या आदित्य झांगूने क्रूझरवेट गटात तामिळनाडूच्या अबिलास के याला दुसऱ्या फेरीत टीकेओने पराभूत केले. अबिलास फक्त १.१२ मिनिटे टिकला. तेलंगणाच्या मोहम्मद जुनैदने बँटमवेट गटात उत्तर प्रदेशच्या कुलदीप टरकरला दुसऱ्या फेरीत नॉकआउट केले.
