पणजी : फौन्तेन्हाज येथे पर्यटक आणि स्थानिक यांच्यात वारंवार होणाऱ्या वादाच्या पार्श्वभूमीवर पुढील आठवड्यात विशेष बैठक घेण्यात येणार आहे. यामध्ये पोलीस, वाहतूक, पर्यटन , जिल्हाधिकारी कार्यालय, महापालिका अधिकारी आणि स्थानिक उपस्थित राहतील अशी माहिती महापौर रोहित मोन्सेरात यांनी दिली. यावेळी स्थानिकांकडून आलेल्या सूचनांवर विचार करून त्यावर अंमलबजावणी करण्यात येणार असल्याचे त्यांनी सांगितले.
बुधवारी सेंट टोमे येथील स्थानिकांनी महापौर रोहित मोन्सेरात यांची भेट घेऊन आपल्या समस्या मांडल्या. यानंतर मोन्सेरात यांनी माध्यमांशी संवाद साधला. या भागात अती प्रमाणात पर्यटन होत आहे. पहाटे ६ पासून रात्री उशीरा पर्यंत येथे गर्दी असते. अनेकदा पर्यटक दंगा मस्ती करतात. काही वेळेस ते थेट घरात घुसून व्हिडिओ काढतात असे त्यांना स्थानिकांनी सांगितल्याचे ते म्हणाले.
ते म्हणाले, समाज माध्यमांमुळे हा भाग सर्वत्र प्रसिद्ध झाला आहे. येथील रेस्टॉरंट आणि हॉटेलमुळे देखील हा भाग काहीसा व्यवसायिक झाला आहे. त्यामुळे साहजिकच येथे पर्यटकांची संख्या वाढली आहे. पर्यटनाला प्रोत्साहन जरूर द्यावे. मात्र पर्यटकांनी देखील योग्य वर्तन करणे आवश्यक आहे. त्रास देणाऱ्या पर्यटकांसाठी पोलीस तैनात करणे गरजेचे आहे. येथे पर्यटकांची संख्या नियंत्रित करावी असे स्थानिकांचे म्हणणे आहे.
येथील स्थानिक लोकांनी यंदा फेस्त दो पोवो न करण्याचा निर्णय घेतला आहे. लोकांना नको असेल तर आम्ही या भागात या फेस्टिवलचे आयोजन करणार नसल्याचे महापौर रोहित मोन्सेरात यांनी स्पष्ट केले.