सुपरस्टार अभिनेता, राजकारणी, दक्षिण चित्रपट उद्योगातील ज्येष्ठ अभिनेते पवन कल्याण यांना कोणत्याही परिचयाची गरज नाही. त्यांचा चित्रपट पाहण्यासाठी चाहते चित्रपटगृहात मोठी गर्दी करतात. आपल्या सिनेमाच्या जोरावर पवन कल्याण यांनी मोठी कमाई देखील केली आहे. याशिवाय राजकारणी म्हणूनही त्यांनी नाव कमावले असून २०२४च्या लोकसभा निवडणुकीत ते ‘एनडीए’चा भाग आहेत. पवन कल्याण यांची नेट वर्थ गेल्या पाच वर्षांत तीन पटीने वाढली आहे.
अभिनेते-राजकारणी आणि जनसेना प्रमुख पवन कल्याण यांनी पिठापुरम लोकसभा मतदारसंघातून उमेदवारी दाखल केली होती. दहावीपर्यंत शिकलेल्या दाक्षिणात्य अभिनेत्याचा राजकीय प्रवास उल्लेखनीय राहिला असून त्यांच्या संपत्तीतही मोठी वाढ झाली आहे. निवडणूक प्रतिज्ञापत्रानुसार, गेल्या पाच वर्षांत पवन कल्याण यांच्या संपत्तीत १९१ टक्क्यांनी प्रचंड वाढ झाली आहे. त्यांनी घोषित केलेल्या मालमत्तेवर नजर टाकली तर, पवन कल्याण आणि त्यांची पत्नी आणि ४ अवलंबितांकडे एकूण १६३ कोटी रुपयांची मालमत्ता आहे.
५६ कोटींवरून १६३ कोटींपर्यंतचा प्रवास
२०१९ मध्ये त्यांच्या मालमत्तेचा खुलासा करताना, पवन कल्याण यांनी त्यांची एकूण संपत्ती ५६ कोटी रुपये असल्याचे घोषित केले होते, जे गेल्या पाच वर्षांत रॉकेटच्या वेगाने वाढले आहे आणि त्यात १०७ कोटी रुपयांची वाढ झाली आहे. कोट्यवधींच्या मालमत्तेचे मालक पवन कल्याण यांच्यावरही ६५ कोटींचे कर्ज आहे. कल्याण यांच्या उत्पन्नात गेल्या काही वर्षांतील चढ-उतारांचीही माहिती प्रतिज्ञापत्रात देण्यात आली आहे. २०१८-१९ मध्ये त्यांचे १.१ कोटी रुपयांचे नुकसान झाले होते, तर २०२२-२३ मध्ये त्यांचे उत्पन्न १२.२ कोटी रुपये होते.
आलिशान घर आणि महागडी कार, बाईक्स
पवन कल्याण नेट वर्थ तपशिलांमध्ये, त्यांची जंगम मालमत्ता ४६ कोटी रुपये असल्याचे सांगितले आहे. त्यापैकी एक मोठा भाग त्यांच्या बँक खात्यांमध्ये जमा केलेली रक्कम आहे. पवन कल्याणला महागड्या आणि आलिशान कार आणि बाइक्सचा शौक आहे आणि त्याचे कलेक्शन अप्रतिम आहे. पवन कल्याण यांच्या कार-बाईक कलेक्शनमध्ये १४ कोटी रुपयांच्या कार आणि बाइक्स आहेत. यामध्ये एक हार्ले डेव्हिडसन बाईक, बेंझ मेबॅच, रेंज रोव्हर स्पोर्ट्स (रु. ५.४ कोटी) आणि टोयोटा क्रूझर (रु. २.३ कोटी) यांचा समावेश आहे.
