बॉलीवूड सुपरस्टार सलमान खानच्या घराबाहेर गोळीबार प्रकरणी पोलीस सातत्याने कारवाई करत आहेत. मुंबई क्राइम ब्रँचने गोळीबार प्रकरणात सहभागी असलेल्या दोन्ही दुचाकीस्वार आरोपींना गुजरातमधील भुज येथे शोधून काढले आहे. एका पथकाने गुजरातमध्ये जाऊन दोन्ही आरोपींना अटक केली.
मुंबई : बॉलिवूड अभिनेता सलमान खानच्या घराबाहेर झालेल्या गोळीबार प्रकरणात मुंबई गुन्हे शाखेला मोठे यश मिळाले आहे. पोलिसांनी गोळीबार करणाऱ्या दोन्ही आरोपींना गुजरातच्या भुज येथून अटक केली आहे. आता दोन्ही आरोपींना मुंबईत आणण्यात येत आहे. मुंबई पोलिसांच्या पथकाने गुजरातमध्ये जाऊन दोन्ही आरोपींना अटक केली. गुन्हे शाखेच्या सूत्रांनी दिलेल्या माहितीनुसार, विक्की गुप्ता (२४) आणि सागर पाल (२१) अशी अटक केलेल्या दोन आरोपींची नावे आहेत. दोन्ही आरोपी गोळीबार करणारे बिहारमधील मसिह, पश्चिम चंपारण येथील रहिवासी आहेत. या दोघांवर यापूर्वीही चोरी, चेन स्नॅचिंग असे गुन्हे दाखल आहेत.
याप्रकरणी मुंबई पोलिसांनी पनवेल येथून दोघांना ताब्यात घेतले होते. या दोघांनी सलमानच्या घरावर गोळीबार करणाऱ्या नेमबाजांना सेकंड हँड बाईक विकली होती. सलमान खानचे फार्महाऊस पनवेलमध्येच आहे, त्यामुळे आता सलमानच्या फार्महाऊसलाही टार्गेट करण्यात आले होते का, याचाही शोध पोलिस घेत आहेत. मुंबई पोलिसांचे पथक ५ राज्यांमध्ये शूटर्सचा शोध घेत होते. या दोन आरोपींना काल रात्री गुजरातमधील भुज येथे अटक करण्यात आली. आता त्यांना मुंबईत आणण्याची तयारी सुरू असून, त्यांची मुंबईत चौकशी केली जाणार आहे.
रविवारी अभिनेता सलमानच्या घराबाहेर दुचाकीवरून आलेल्या दोघांनी गोळीबार केला, ज्यामध्ये गँगस्टर लॉरेन्स विश्नोईशी संबंधित लोकांची नावेही समोर आली आहेत. सलमानच्या घरावर झालेल्या गोळीबारामागे लॉरेन्स बिश्नोई टोळीच्या रोहित गोदाराचा हात असल्याचा दावा केला जात आहे. राजस्थानचा कुख्यात गुंड रोहित गोदरा अमेरिकेत राहतो. त्याने अमेरिकेत बसून शूटर्सचे नियोजन आणि व्यवस्था केली. त्यांना शस्त्रे पुरवली आणि सलमान खानचे घर आणि फार्म हाऊसची माहिती मिळवण्यात मदत केली. सुखदेव सिंग गोगामेडी आणि सिद्धू मूसवाला हत्याकांडातही रोहित गोदाराचे नाव पुढे आले होते.
रोहित गोदरा हा लॉरेन्स बिश्नोई टोळीचा खास सदस्य आहे. तो शूटर्स आणि शस्त्रांची व्यवस्था करणाऱ्यांचे सर्वात मोठे नेटवर्क चालवतो. पोलिसांनी दिलेल्या माहितीनुसार, लॉरेन्सचा भाऊ अनमोल बिश्नोई याने सलमानच्या घरावर गोळीबार करण्याची जबाबदारी रोहित गोदाराला दिली होती. रोहित गोदाराने विशाल उर्फ कालू नावाच्या शूटरला हे काम दिले होते. लॉरेन्स बिश्नोई आणि त्याची टोळी अनेक वर्षांपासून सलमान खानला धमकावत आहे. 
