ऑस्ट्रेलियाचे मालिकेत आव्हान कायम : भारताचा ५ गडी राखून पराभव
गुवाहाटी : ग्लेन मॅक्सवेलने शानदार शतक झळकावत भारताविरुद्धच्या तिसऱ्या टी-२० सामन्यात ऑस्ट्रेलियाला ५ गडी राखून विजय मिळवून दिला. प्रथम फलंदाजी करताना भारताने २० षटकांत ३ गडी गमावून २२२ धावा केल्या. भारतासाठी, ऋतुराज गायकवाडने २१५.७९ च्या स्ट्राइक रेटने नाबाद १२३ धावांची खेळी खेळली. मात्र त्याची खेळी व्यर्थ गेली. मॅक्सवेलने ४८ चेंडूत ८ चौकार आणि ८ षटकारांच्या मदतीने नाबाद १०४ धावांची खेळी केली.
तिसरा सामना जिंकून ऑस्ट्रेलियाने मालिकेत स्वतःला कायम ठेवले आहे. चौथ्या क्रमांकावर आलेल्या ग्लेन मॅक्सवेलने ऑस्ट्रेलियाच्या विजयाच्या आशा पुन्हा जागृत केल्या, ज्या हळूहळू मावळत होत्या. शेवटच्या चेंडूवर मॅक्सवेलने ऑस्ट्रेलियाला विजय मिळवून दिला. बारसापारा क्रिकेट स्टेडियमवर, मॅक्सवेलने स्टँडवर उपस्थित भारतीय चाहत्यांना पूर्णपणे शांत केले.
ऑस्ट्रेलियाने नाणेफेक जिंकून प्रथम गोलंदाजी करण्याचा निर्णय घेतला, जो सुरुवातीला योग्य वाटत होता. भारतीय संघाने २.३ षटकांत २४ धावा असताना २ विकेट गमावल्या होत्या. मात्र यानंतर ऋतुराज गायकवाडने शानदार खेळी करत भारताला २२२ धावांपर्यंत नेले. कर्णधार सूर्यकुमार यादवनेही उपकर्णधार गायकवाडला १०.२ षटकांत चांगली साथ दिली. सूर्या यांच्यानंतर गायकवाडला पाठिंबा देण्याची जबाबदारी तिलक वर्मा याने घेतली. गायकवाड आणि वर्मा यांनी चौथ्या विकेटसाठी अभेद्य १४१ धावांची भागीदारी केली.
भारताने लवकर विकेट गमावल्या
प्रथम फलंदाजी करण्यासाठी आलेल्या भारतीय संघाने अवघ्या २४ धावांवर २ विकेट गमावल्या. संघाची पहिली विकेट दुसऱ्याच षटकात यशस्वी जैस्वालच्या रूपाने पडली. तो ६ धावा करून जेसन बेहरेनडॉर्फचा बळी ठरली. यानंतर तिसऱ्या षटकात ईशान किशन खाते न उघडता केन रिचर्डसनकडे बाद झाला.
यानंतर ऋतुराज गायकवाड आणि कर्णधार सूर्यकुमार यादव यांनी तिसऱ्या विकेटसाठी ४७ चेंडूत ५७ धावांची भागीदारी केली. ही भागीदारी ११व्या षटकात सूर्याच्या बाद होण्याने संपली. चांगल्या धावसंख्येच्या दिशेने वाटचाल करणारा सूर्यकुमार यादव २९ चेंडूंत ५ चौकार आणि २ षटकारांच्या मदतीने ३९ धावा काढून बाद झाला. सूर्याला आरोन हार्डीने यष्टीरक्षकाद्वारे बाद केले.
त्यानंतर ऋतुराज गायकवाड आणि तिलक वर्मा यांनी चौथ्या विकेटसाठी ५९ चेंडूत नाबाद १४१ धावांची भागीदारी केली. याशिवाय तिलक वर्माने २४ चेंडूत ४ चौकारांच्या मदतीने नाबाद ३१ धावा केल्या. दोन्ही फलंदाजांसमोर ऑस्ट्रेलियन गोलंदाज अपयशी ठरले.
ऑस्ट्रेलियन गोलंदाजांना चांगले धुतले
भारतीय फलंदाजांनी ऑस्ट्रेलियन गोलंदाजांचा चांगलाच समाचार घेतला. अॅरॉन हार्डी सर्वात महागडा ठरला. त्याने ४ षटकांत १६ च्या इकॉनॉमीमध्ये ६४ धावा दिल्या. त्याला एक विकेट मिळाली. याशिवाय जेसन बेहरेनडॉर्फ आणि केन रिचर्डसन यांना १-१ बळी मिळाला. यादरम्यान बेहरेनडॉर्फने ४ षटकांत केवळ १२ धावा दिल्या. तर रिचर्डसनने ३ षटकांत ३४ धावा दिल्या. तर ग्लेन मॅक्सवेलने एकाच षटकात ३० धावा लुटवल्या.
