आयची-नागोया : आशियाई पॅरा स्पर्धेतील पॅरा टेबल टेनिसमध्ये भारताने आतापर्यंतची सर्वोत्तम कामगिरी नोंदवली आहे. जपानमधील आयची-नागोया येथे मंगळवारी झालेल्या स्पर्धेत भारतीय खेळाडूंनी पाच कांस्यपदकांची कमाई केली. रवी बेबी सहाना आणि प्राची पांडे यांनी ‘स्टँडिंग’ (उभे राहून खेळण्याचा प्रकार) गटात पदक जिंकणाऱ्या भारताच्या पहिल्या खेळाडू ठरण्याचा मान मिळवला.
भारताने या स्पर्धेत मिळवलेल्या पाच पदकांमुळे मागील स्पर्धेतील दोन कांस्यपदकांचा विक्रम मागे टाकला. पॅरालिम्पिक पदकविजेती भाविना पटेल आणि सोनलबेन पटेल यांनीही महिला एकेरीच्या उपांत्य फेरीत पराभव पत्करल्यानंतर कांस्यपदके मिळवली. पुरुष एकेरीच्या क्लास-१ गटात जेहान मदन यानेही कांस्यपदक पटकावले. व्हीलचेअर आणि स्टँडिंग खेळल्या जाणाऱ्या अशा दोन्ही गटांत भारताने पदके मिळवली.
सहाना, प्राची यांचा ऐतिहासिक पराक्रम
तामिळनाडूच्या रवी बेबी सहानाला क्लास-९ गटाच्या उपांत्य फेरीत चीनच्या माओ जिंगडियनकडून ८-११, २-११, ४-११ असा पराभव पत्करावा लागला. माओ जिंगडियन ही पाच वेळा पॅरालिम्पिक सुवर्णपदक जिंकलेली खेळाडू आहे.
न्यूरोडिजेनेरेटिव्ह आजाराने ग्रस्त असलेल्या प्राची पांडे हिला क्लास-६ गटाच्या उपांत्य फेरीत इराकच्या विद्यमान पॅरालिम्पिक विजेत्या नजला अल-दयेनीने ११-९, ११-२, ११-८ अशा गुणांनी पराभूत केले.
उपांत्य फेरीत पराभव झाला असला, तरी दोघींनी कांस्यपदके निश्चित केली. आशियाई पॅरा स्पर्धेत उभे राहून खेळल्या जाणाऱ्या गटात पदक मिळवणाऱ्या त्या भारताच्या पहिल्या पॅरा टेबल टेनिसपटू ठरल्या. क्लास-९ गटात पाय किंवा खेळणाऱ्या हातावर परिणाम करणारे शारीरिक व्यंग असलेले खेळाडू सहभागी होतात, तर क्लास-६ गटात हात आणि पायांवर गंभीर परिणाम करणारे व्यंग असलेले खेळाडू खेळतात.
भाविना, सोनलबेनची पदकांची कमाई
- पॅरालिम्पिकमध्ये रौप्यपदक जिंकलेल्या भाविना पटेलला क्लास-४-५ गटाच्या उपांत्य फेरीत चीनच्या आठ वेळा पॅरालिम्पिक विजेत्या झांग बियानकडून ७-११, ५-११, ७-११ असा पराभव पत्करावा लागला. गुजरातच्या ३९ वर्षीय भाविनाने सलग दुसऱ्या आशियाई पॅरा स्पर्धेत पदक मिळवले.
- २०१८ मधील जकार्ता स्पर्धेत दुहेरीत रौप्यपदक जिंकलेल्या सोनलबेन पटेलला क्लास-३ गटाच्या उपांत्य फेरीत दक्षिण कोरियाच्या विद्यमान विजेत्या जियू युनने ११-७, ११-५, ११-६ असे पराभूत केले.
- पुरुष एकेरीच्या क्लास-१ गटात जेहान मदनने पाच खेळाडूंच्या स्पर्धेत चौथे स्थान मिळवले. या गटातील चार सामन्यांपैकी त्याने एक सामना जिंकला.
- भारताच्या संदीप जांगीला मात्र एकही विजय मिळवता आला नाही आणि त्याला शेवटच्या स्थानावर समाधान मानावे लागले.