गुरुग्राम: दिल्ली-एनसीआरमधील गुरुग्राम येथील प्रसिद्ध गोल्फ कोर्स रोडवर स्पोर्ट्स बाईक चालवणाऱ्या एका महिला रायडरला पांढऱ्या रंगाच्या कारने धडक दिल्याचा एक नवीन आणि अत्यंत धक्कादायक व्हिडिओ समोर आला आहे. सोशल मीडियावर 'rebelwheels_sia_' या नावाने ओळखल्या जाणाऱ्या 'सिया' नावाच्या महिला रायडरसोबत हा थरारक अपघात घडला होता. अपघाताच्या वेळी सियाच्या मागे स्वतःच्या दुचाकीवरून प्रवास करणाऱ्या प्रत्यक्षदर्शी मित्राने कॅमेऱ्यात कैद झालेले हे नवीन चित्रीकरण सोशल मीडियावर शेअर केले आहे.
नवीन व्हिडिओ समोर आल्यानंतर कारचालकाने मुद्दाम अपघात घडवून आणल्याचा आरोप केला जात आहे. कारचालकाने आधी सियाच्या बाईकचा पाठलाग करत तिला गाडी थांबवण्याचा इशारा केला होता; मात्र तिने नकार दिल्यानंतर कारचालकाने तिला पाठीमागून जोरदार धडक दिली. अपघाताच्या वेळी कारमधील प्रवाशांनी मद्यप्राशन केले होते आणि कारच्या काचाही बेकायदेशीरपणे काळ्या रंगाच्या (Tinted Glass) करण्यात आल्या होत्या, असा दावा प्रत्यक्षदर्शी मित्राने केला आहे. धडक बसल्यानंतर सिया बाईकवरून खाली फेकली जाऊन रस्त्यावर फरफटत गेली, तर तिची स्पोर्ट्स बाईक सुमारे ३०० मीटरपर्यंत घसरत गेली. अपघातानंतर आरोपी कारचालक कल्याण बैंसला याने घटनास्थळावरून पळ काढला, परंतु मागून येणाऱ्या अन्य रायडर्सनी त्याचा पाठलाग करून ट्रॅफिक सिग्नलवर त्याचा फोटो कॅमेऱ्यात कैद केला.
दुर्घटनेनंतर आरोपी कल्याण बैंसला याने एका मुलाखतीत स्पष्टीकरण देताना "गाडी चालवणारी महिला रायडर आहे हे मला माहीत नव्हते आणि मला या घटनेबद्दल वाईट वाटत आहे," असा दावा केला होता. या दाव्याचा कडक समाचार घेत जखमी सियाने सोशल मीडियावर व्हिडिओ जारी करत आरोपीवर कडाडून टीका केली आहे. "जर तुला खरोखरच सहानुभूती होती, तर तू गाडी का थांबवली नाहीस? अपघात झाल्यानंतर मी तिथेच दगावले असते," असा सवाल उपस्थित करत तिने आरोपींचे दावे पूर्णपणे फेटाळले आहेत. आरोपींनी बराच वेळ पाठलाग केल्यामुळे गाडी चालवणारी महिला असल्याचे त्यांना ठाऊक नव्हते हा दावा पूर्णपणे खोटा असल्याचे तिने स्पष्ट केले. तसेच दिल्ली आणि गुरगावच्या रस्त्यांवर महिला सुरक्षित नसल्याची तीव्र खंतही तिने व्यक्त केली.
या प्रकरणी सियाच्या तक्रारीवरून गुरगाव पोलिसांनी तात्काळ कायदेशीर पावले उचलत आरोपीविरोधात भारतीय न्याय संहितेंतर्गत हत्येचा प्रयत्न, छळ आणि हिट अँड रनच्या विविध गंभीर कलमांखाली एफआयआर दाखल केला आहे. अपघातामुळे सियाच्या शरीरावर गंभीर जखमा झाल्या असून स्नायू दुखावल्याने ती सध्या तीव्र वेदनांशी झुंज देत आहे. पोलीस अधिकारी लवकरच तिचा अधिकृत जबाब नोंदवून घेणार असून या प्रकरणाचा पुढील सखोल तपास सुरू आहे.