गोव्यातून बेळगावला १६.२० लाख किलो भाजी निर्यात

पणजी :गोव्यात भाजी बेळगावहून येते, हे आपण नेहमी ऐकतो. मात्र, गेल्या साडेचार वर्षांत याच्या उलट चित्र पाहायला मिळाले आहे. गोव्यातून तब्बल १६.२० लाख किलो भाजी बेळगावला पाठवण्यात आली आहे. या भाजीला २८.८५ लाख रुपयांचा दर मिळाला असून, त्यात सर्वाधिक ४२ टक्के निर्यात एकट्या काकडीची झाली आहे, असे गोवा फलोत्पादन विकास महामंडळाने सांगितले.

गोवा राज्य फलोत्पादन विकास महामंडळ स्थानिक शेतकऱ्यांकडून खरेदी केलेली भाजी सर्वप्रथम स्वतःच्या आउटलेट्स आणि स्थानिक खासगी विक्रेत्यांना वितरित करते. राज्याची मागणी पूर्ण झाल्यानंतर उरलेली भाजी विक्रीसाठी बेळगाव मार्केट यार्डात पाठवली जाते. सध्याची मागणी आणि बाजारातील गरज लक्षात घेऊन संबंधित पुरवठादार ही भाजी बेळगावला पाठवतात आणि त्यानंतर हा पुरवठादार बेळगाव बाजारात किंवा मोठ्या खासगी विक्रेत्यांना भाजी विकतो, असे गोवा राज्य फलोत्पादन विकास महामंडळाने सांगितले.

भाजी निर्यातीत लक्षणीय वाढ

सन २०२२-२३ ते २०२६-२७ (ऑगस्टपर्यंत) या कालावधीत भाजीच्या निर्यातीमध्ये बरीच वाढ झाली आहे. मात्र, २०२४-२५ मध्ये भाजीच्या पुरवठ्यात १.४२ लाख किलोची घट नोंदवली गेली. त्याच वर्षी भाजीच्या दरात २ लाख रुपयांची वाढ झाल्याचे आकडेवारीतून स्पष्ट होते.