म्हापसा : शुक्रवारी रात्री म्हापसा शहरासह पर्वरीमध्ये चोरांनी धुमाकूळ घालत अकरा दुकानांसह दोन फ्लॅट फोडले. लाखो रूपयांच्या मुद्देमालावर डल्ला मारला. यामध्ये पर्वरी येथील सपनीश पॅलेस इमारतीमधील फ्लॅट मधील २५ लाखांच्या दागिन्यांचा समावेश आहे.
येथील आठवडा बाजाराची संधी साधून चोरांनी म्हापसा शहरातील बाजारपेठेतील तब्बल ११ दुकाने फोडली. गणेशपुरी येथील एका बहुमजली निवासी इमारतीतील शिरोडकर यांचा फ्लॅट फोडला. शिरोडकर यांच्या फ्लॅटमधून चोरांनी रोख रक्कम व दागिने मिळून अडीच लाखांचा मुद्देमाल चोरला. तर बाजारपेठेतील दुकानांमधून किरकोळ रोख रक्कम व काही वस्तू चोरण्यात आल्या. या चोरींच्या प्रकारांमुळे बाजारपेठेतील व्यापारी तसेच म्हापशातील नागरिकांमध्ये भितीचे वातावरण पसरले. असून पोलीस गस्त व सुरक्षतेवर गंभीर प्रश्न निर्माण झाले आहेत.
चोरांनी बाजारपेठेतील उपहारगृह, कपड्यांचे दुकान, मोबाईल शॉपी, लेडीज टेलर, चप्पल विक्री तसेच घाऊक व किरकोळ विक्रीच्या अशा एकूण आठ दुकानांची कुलपे तोडून ही चोरी केली. चोरांनी चोरी केल्या4नंतर दुकानांचे शटर होते तसे बंद केले. दुकानातील गल्ल्यातील रोख रक्कम आणि इतर वस्तू मिळून सुमारे एक ते दोन लाख रुपयांचा मुद्देमाल लंपास करण्यात आला आहे.
पर्वरीतील फ्लॅटमधून २५ लाखांचा ऐवज लंपास
शुक्रवारी रात्री पर्वरी येथील सपनीश पॅलेस या बहुमजली इमारत कॉम्पलेक्स मधील फ्लॅठ चोरांनी फोडला. या फ्लॅटमधून अंदाजे २५ लाखांचे ऐवज लंपास केले. पर्वरी पोलिसांनी या चोरीबाबत कमालीची गुप्तता बाळगली आहे. पोलीस चोरांना पकडण्यासाठी परीसरातील सीसीटीव्ही फुटेजची तपासणी करत आहेत.
