पणजी : हरमल येथील हरमल पंचक्रोशी हायस्कूलमध्ये विद्यार्थ्याला मारहाण केल्यावरून वर्गशिक्षकांना जाब विचारणे आणि शालेय व्यवस्थापनातील त्रुटींवर प्रश्न उपस्थित केल्याबद्दल एका महिला पालकाला तासनतास डांबून ठेवून अपमानास्पद वागणूक दिल्याचा आरोप करत मांद्रे पोलीस स्थानकात तक्रार दाखल करण्यात आली आहे.
संस्थेचे चेअरमन लक्ष्मीकांत पार्सेकर यांची भूमिका
या संपूर्ण प्रकरणावर संस्थाध्यक्ष तथा माजी मुख्यमंत्री लक्ष्मीकांत पार्सेकर यांनी आपली सविस्तर भूमिका मांडत सर्व आरोप पूर्णपणे फेटाळून लावले आहेत. हा संपूर्ण प्रकार बनावट, खोटा आणि राजकीय हेतूने प्रेरित असल्याचा दावा त्यांनी केला आहे. ज्या पालकांच्या आणि विद्यार्थ्यांच्या नावाचा वापर करून एफआयआर दाखल करण्यात आला आहे, ते विद्यार्थी हायर सेकंडरीमध्ये नव्हे तर हायस्कूलमध्ये शिकतात, असे स्पष्ट करत त्यांनी तक्रारीतील विसंगती दाखवून दिली. कोणीतरी बाहेरच्या व्यक्तीने आणि राजकीय विरोधकांनी स्वतःहून ही खोटी तक्रार तयार करून दाखल करायला लावली आहे, जेणेकरून संस्था आणि त्यांची वैयक्तिक प्रतिमा मलीन करता येईल.
मागील वर्षी डिसेंबर महिन्यात या विद्यार्थ्यांना दुसऱ्या एका कॉन्व्हेंट शाळेतून सोडल्याचे प्रमाणपत्र मिळाल्यानंतर कोणतीही शाळा त्यांना प्रवेश देत नव्हती. विद्यार्थ्यांचे शैक्षणिक वर्ष वाया जाऊ नये म्हणून केवळ मानवीय दृष्टिकोनातून आणि विद्यार्थ्यांच्या हिताचा विचार करून त्यांनी स्वतः मुख्याध्यापकांना सांगून प्रवेश दिला होता. मात्र, एवढी मदत करूनही आता त्यांच्याच विरोधात खोटे आरोप लावून संस्था बदनाम केली जात आहे. हे एक पूर्वनियोजित राजकीय नाटक असून, यामागे कोणते विरोधक आहेत हे जनतेला ठाऊक आहे, असे सांगत त्यांनी हे सर्व आरोप फेटाळले आहेत.
घटना काय आहे
तुये येथील आरती विजय परब यांनी दिलेल्या पोलीस तक्रारीनुसार, त्यांच्या अल्पवयीन मुलाला छोटी वही आणल्याच्या कारणावरून शिक्षिकेने मारहाण केली होती. तसेच त्यांच्या मुलीच्या बाबतीतही उपाहारगृहातील पैशांवरून आणि जंतनाशक गोळी देण्यावरून वाद निर्माण झाला होता. १६ ऑक्टोबर रोजी स्नेहसंमेलनाच्या सरावानंतर मुलगी उशिरा घरी पोहोचल्याने पालकांनी व्हॉट्सअॅप गटावर चिंता व्यक्त केली होती. यानंतर १९ ऑक्टोबर रोजी शाळा प्रशासनाने त्यांना चर्चेसाठी बोलावले. तेथे नियंत्रण कक्षात बोलावून प्राचार्य आणि शिक्षकांनी व्हॉट्सअॅप मेसेजबाबत जाब विचारत अपमानास्पद वागणूक दिली, अंगावर धावून येण्याचा प्रयत्न केला आणि खोलीत तासभर डांबून ठेवून माफी मागण्यास भाग पाडले, असा आरोप तक्रारीत करण्यात आला आहे. सध्या मांद्रे पोलीस या सर्व प्रकरणाचा अधिक तपास करत आहेत.