🚨LIVE पावसाळी अधिवेशन : पहिला दिवस | आयडीसी भूखंड वाटपावरून विजय-मॉविन आमनेसामने

पणजी: गोवा विधानसभेच्या पावसाळी अधिवेशनादरम्यान गोवा औद्योगिक विकास महामंडळ (Goa IDC) भूखंड वाटप प्रकरणावरून सत्ताधारी आणि विरोधकांमध्ये जोरदार खडाजंगी पाहायला मिळाली. आयडीसी भूखंड वाटपातील कथित गैरव्यवहाराची चौकशी करण्यासाठीसभागृह चिकित्सा समिती स्थापन करण्याची मागणी विरोधी आमदार विजय सरदेसाई यांनी सभागृहात केली. या मुद्यावरून गोवा फॉरवर्ड पक्षाचे आमदार विजय सरदेसाई आणि उद्योगमंत्री मॉविन गुदिन्हो यांच्यात  वैयक्तिक पातळीवर आरोप-प्रत्यारोप झाले, ज्यामुळे सभागृहातील वातावरण कमालीचे तापले होते.

घोटाळा उघड करण्यात अपयशी ठरल्यास आगामी विधानसभा निवडणूक लढवणार नाही : विजय 

सभागृहात मुद्दा मांडताना विजय सरदेसाई यांनी आयडीसीच्या सुधारित निकषांवर गंभीर सवाल उपस्थित केले. गोवा आयडीसीने पात्रतेसाठी आवश्यक असणारी किमान उलाढाल (Turnover) ६०० कोटी रुपयांवरून थेट १०० कोटी रुपये आणि निव्वळ मूल्य (Net Worth) २०० कोटी रुपयांवरून ३० कोटी रुपयांपर्यंत का घटवले, असा प्रश्न विचारत त्यांनी या निर्णयाच्या आधारावर संशय व्यक्त केला. या कथित घोटाळ्याची चौकशी करण्यासाठी तात्काळ सभागृह चिकित्सा समिती गठीत करावी आणि त्यात आपला समावेश करावा, अशी मागणी त्यांनी केली. तीन महिन्यांच्या आत या प्रकरणाचा पर्दाफाश करण्यात अपयशी ठरल्यास आगामी विधानसभा निवडणूक लढवणार नाही, असे थेट आव्हानच सरदेसाई यांनी सरकारला दिले.

हे तर 'भू-रूपांतरांचे जनक' आहेत : मॉविन  

उद्योगमंत्री मॉविन गुदिन्हो यांनी या सर्व आरोपांचे खंडन करत सरकारच्या निर्णयाचे समर्थन केले. बाजारात निकोप स्पर्धा वाढवण्यासाठी आणि गोव्यात अधिक उद्योगांना आकर्षित करण्याच्या उद्देशानेच गुंतवणुकीचे निकष शिथिल करण्यात आल्याचे त्यांनी स्पष्ट केले. विजय सरदेसाई यांनी उपस्थित केलेले प्रश्न अनावश्यक असल्याचे सांगत मॉविन गुदिन्हो यांनी पलटवार केला. तसेच सरदेसाई यांचा सर्व 'भू-रूपांतरांचे जनक' (Father of All Conversions) असा उल्लेख करत त्यांच्यावर वैयक्तिक आरोप केले. या वाक्युद्धामुळे सभागृहात मोठा गोंधळ निर्माण झाला.