🚨LIVE पावसाळी अधिवेशन : पहिला दिवस | एनडीझेड आणि कलम ३९-अ प्रश्नावरून विधानसभेत गदारोळ

पणजी: गोवा विधानसभेच्या पावसाळी अधिवेशनाच्या पहिल्याच दिवशी सभागृहात प्रचंड गदारोळ पाहायला मिळाला. नगर व नियोजन (TCP) कायद्याचे कलम ३९-अ, प्रादेशिक आराखडा आणि नो-डेव्हलपमेंट झोन (NDZ) यांसारख्या अत्यंत संवेदनशील विषयांवरील संयुक्त तारांकित प्रश्न सरकारने अमान्य केल्यामुळे विरोधक आक्रमक झाले. या मुद्द्यावरून विरोधी पक्षाच्या आमदारांनी सभापतींच्या हौद्यात धाव घेऊन जोरदार निदर्शने केली. सभागृहातील वाढता गोंधळ लक्षात घेता सभापती गणेश गावकर यांनी विधानसभेचे कामकाज सुरुवातीला १० मिनिटांसाठी तहकूब केले.

विरोधकांचा गदारोळ.. 

आज सकाळच्या सत्रात अधिवेशनाचे कामकाज सुरू होताच विजय सरदेसाई वगळता विरोधी पक्षनेते युरी आलेमाव, काँग्रेस आमदार कार्लूस फेरेरा, आम आदमी पक्षाचे आमदार व्हेन्झी व्हिएगस आणि रिव्हॉल्युशनरी गोवन्स पक्षाचे आमदार विरेश बोरकर यांच्यासह सहा विरोधी आमदारांनी हा प्रश्न फेटाळण्याच्या निर्णयावर कडक आक्षेप नोंदवला. कलम ३९-अ आणि प्रादेशिक आराखड्यांतर्गत विकासमुक्त क्षेत्राची व्याख्या व घोषणा यावर सभागृहात चर्चा टाळण्यासाठीच सरकारने तांत्रिक कारणांचे नाव पुढे करत प्रश्न नाकारल्याचा आरोप विरोधकांनी केला. विरोधी पक्षनेते युरी आलेमाव यांनी सरकारवर गंभीर आरोप करताना म्हटले की, एनडीझेड तरतुदींचा वापर व्यावसायिक हितसंबंध जपण्यासाठी आणि जमिनीच्या व्यवहारांसाठी केला जात असून, याचा गोव्यातील पर्यावरण व शाश्वत विकासावर विपरीत परिणाम होत आहे.

सभापती गणेश गावकर यांनी सर्व विरोधी सदस्यांना आपल्या जागी बसून नियम पाळण्याचे आणि कामकाज सुरळीत चालू देण्याचे वारंवार आवाहन केले, मात्र विरोधकांनी आंदोलन सुरूच ठेवले. १० मिनिटांच्या तहकुबीनंतर अधिवेशन पुन्हा सुरू झाले तरी विरोधकांचा गदारोळ कायम राहिला. अखेर सभापतींच्या निर्देशानुसार गदारोळ करणारे आमदार विरेश बोरकर आणि विरोधी पक्षनेते युरी आलेमाव यांना मार्शलकरवी सभागृहाबाहेर काढण्यात आले.

दरम्यान, अधिवेशनाच्या गदारोळासोबतच गोव्यातील कायदा व सुव्यवस्थेचा मुद्दाही तापला आहे. पर्वरी येथील मेजेस्टिक कॅसिनोच्या संचालकावर झालेल्या गोळीबाराची घटना आज सकाळी क्राईम ब्रांचकडे सुपूर्द करण्यात आली आहे. या प्रकरणातील गोळीबार करणाऱ्या आरोपींना (शूटर्स) लवकरात लवकर अटक केली जाईल, अशी माहिती मुख्यमंत्री डॉ. प्रमोद सावंत यांनी दिली. अधिवेशनाच्या पहिल्याच दिवशी घडलेल्या या नाट्यमय घडामोडींमुळे आगामी दिवसांत सत्ताधारी आणि विरोधकांमधील राजकीय संघर्ष अधिक तीव्र होण्याचे स्पष्ट संकेत मिळत आहेत.