पणजी :क्वालालंपूर, मलेशिया येथे २८ ते ३० ऑगस्ट या कालावधीत होणाऱ्या ‘मलेशिया लॅक्रोस स्पर्धेसाठी’ भारतीय पुरुष संघात गोव्याच्या मोशे देवप्पा आणि सिरवाम देऊळकर यांची निवड झाली आहे. गोव्याने २०२३ आणि २०२४ च्या ज्युनियर लॅक्रोस राष्ट्रीय स्पर्धेत रौप्यपदके जिंकली असून, या निवडीमुळे राष्ट्रीय पातळीवर राज्याच्या वाढत्या प्रभावावर शिक्कामोर्तब झाले आहे.
गोवा लॅक्रोस असोसिएशनने (जीएलए) तळागाळातील शिबिरे आणि शालेय कार्यक्रमांच्या माध्यमातून या खेळाच्या विकासात वेगाने प्रगती केली आहे. येत्या दोन वर्षांत अधिक शाळा आणि संस्थांमध्ये लॅक्रोस सुरू करून खेळाडूंची संख्या वाढवण्याची योजना आहे.
हा गोव्यासाठी अभिमानाचा क्षण आहे. मोशे हा केवळ खेळाडूच नाही, तर प्रशिक्षक म्हणूनही तळागाळातील विकासासाठी कठोर परिश्रम घेत आहे. त्याची ही निवड मेहनत आणि बांधिलकीचे फळ आहे. तसेच, कौशल्यांचा विकास करण्यासाठी अनेक तास मेहनत घेणाऱ्या सिरवामचेही अभिनंदन, असे ‘जीएलए’चे वरिष्ठ उपाध्यक्ष तेजेंद्र लवंदे यांनी सांगितले.
व्यावसायिक लीगची योजना
गोव्यातील अधिकाधिक युवा खेळाडूंपर्यंत लॅक्रोस पोहोचवणे हे प्राधान्य आहे. येत्या दोन वर्षांत हा खेळ अधिक व्यापक करण्याच्या दिशेने काम सुरू आहे. तसेच, तळागाळातील सहभागापासून स्पर्धात्मक आणि व्यावसायिक स्तरापर्यंतचा मार्ग तयार करण्यासाठी या वर्षाच्या अखेरीस एक व्यावसायिक लीग सुरू करण्याची योजना आहे, असे सचिव मंगेश पवार यांनी सांगितले.
लॉस एंजेलिस येथे होणाऱ्या २०२८ च्या ऑलिम्पिक क्रीडा स्पर्धेत लॅक्रोसच्या सिक्सस प्रकाराचा समावेश होणार आहे. या पार्श्वभूमीवर राष्ट्रीय तसेच आंतरराष्ट्रीय स्पर्धांचे आयोजन करण्यासाठी गोव्याला या खेळाचे एक महत्त्वाचे केंद्र म्हणून प्रस्थापित करण्याची मोठी संधी असल्याचे गोवा लॅक्रोस असोसिएशनला वाटते.
तळागाळातून राष्ट्रीय स्तराकडे वाटचाल
गोवा लॅक्रोस असोसिएशनकडून शालेय कार्यक्रम, प्रशिक्षण शिबिरे आणि स्थानिक पातळीवरील सहभाग वाढवण्यावर भर दिला जात आहे. २०२३ आणि २०२४ मधील ज्युनियर राष्ट्रीय स्पर्धेतील रौप्यपदकांसह आता दोन खेळाडूंची भारतीय संघात झालेली निवड ही या प्रयत्नांना मिळालेली महत्त्वाची पावती ठरली आहे.