पोलिसांच्या लाठीचार्जमध्ये मोहन जखमी, विद्यार्थिनीने रुग्णालयात घेतली रात्रंदिवस काळजी. शुद्धीवर येताच तरुणीने दिली प्रेमाची कबुली, मोहननेही दिला होकार.
नवी दिल्ली: नेहमी घोषणाबाजी, मागण्या आणि पोलिसांचा कडक बंदोबस्त पाहायला मिळणाऱ्या दिल्लीतील जंतर-मंतरवर सध्या एका अनोख्या प्रेमकहाणीची जोरदार चर्चा सुरू आहे. 'नीट' (NEET) पेपरफुटी प्रकरणाच्या निषेधार्थ सुरू असलेल्या विद्यार्थी आंदोलनादरम्यान बिहारच्या एका विद्यार्थ्याची आणि दिल्लीतील विद्यार्थिनीची ओळख झाली. या ओळखीचे रूपांतर आधी मैत्रीत आणि नंतर थेट प्रेमात झाले. अखेर या दोघांनी मंदिरात जाऊन अत्यंत साध्या पद्धतीने विवाह केला आहे.
बिहारचा रहिवासी असलेला मोहन श्रीवास्तव हा केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी जंतर-मंतरवर सुरू असलेल्या आंदोलनात अनेक दिवसांपासून सहभागी होता. आंदोलनस्थळी राहणाऱ्या विद्यार्थ्यांसाठी खाण्या-पिण्याची पुरेशी व्यवस्था नसल्याने अनेकांची मोठी गैरसोय होत होती. अशा कठीण वेळी दिल्लीतील एका विद्यार्थिनीने मोहनला मदतीचा हात दिला. ती दररोज घरून त्याच्यासाठी काही ना काही खाऊ घेऊन येत असे.
एके दिवशी मोहनने तिला गंमतीने विचारले, “खायला तर देतेस, पण पाणी कोण देणार?” यावर ती फक्त हसली, मात्र दुसऱ्याच दिवशी तिने त्याच्यासाठी पाण्याची एक मोठी बाटली आणली. या छोट्याशा प्रसंगामुळे त्यांच्यातील संवाद अधिक वाढला. विशेष म्हणजे, ती विद्यार्थिनीदेखील 'नीट' परीक्षेची उमेदवार होती आणि पेपरफुटीविरोधात न्याय मागण्यासाठीच ती या आंदोलनात सहभागी झाली होती.
दरम्यान, काही दिवसांनी आंदोलनावर दिल्ली पोलिसांनी लाठीचार्ज केला. या गोंधळात मोहनच्या डोक्याला गंभीर दुखापत झाली आणि तो जागीच बेशुद्ध पडला. त्या विद्यार्थिनीने क्षणाचाही विलंब न लावता त्याला तातडीने रुग्णालयात दाखल केले. उपचारादरम्यान तिने रात्रंदिवस त्याची काळजी घेतली. मोहन शुद्धीवर आल्यानंतर तिने आपल्या मनातील भावना व्यक्त करत त्याला सांगितले, “मी तुझ्याशिवाय राहू शकत नाही.” मोहननेही तिच्या या प्रेमाला सकारात्मक प्रतिसाद दिला. यानंतर रुग्णालयातून बाहेर आल्यावर दोघांनी थेट मंदिरात जाऊन एकमेकांसोबत लग्नगाठ बांधली.
या अनोख्या प्रेमकहाणीबाबत विचारले असता त्या विद्यार्थिनीने अत्यंत भावुक प्रतिक्रिया दिली. ती म्हणाली, “प्रेम कधी ठरवून होत नाही. ते कुठे, कधी आणि कसं होईल, हे कोणालाही सांगता येत नाही.” आंदोलनाच्या पार्श्वभूमीवर फुललेल्या या प्रेमकहाणीचा व्हिडिओ सध्या सोशल मीडियावर प्रचंड व्हायरल होत आहे. अनेक नेटकऱ्यांनी या घटनेला ‘रिअल लाईफ फिल्मी लव्ह स्टोरी’ म्हटले असून, न्याय मागता-मागता जुळलेल्या या नात्याचे सर्वत्र कौतुक केले जात आहे.
