मोबाईल लोकेशन आणि सीडीआरमुळे हत्येचा संपूर्ण कट उघड. युपीतील घटना
लखनऊ : नात्यांमधील विश्वास जेव्हा संपतो आणि अनैतिकतेचा अंधार गडद होतो, तेव्हा त्याचा शेवट अत्यंत भयानक आणि जीवघेणा ठरतो. उत्तर प्रदेशातील फतेहपूर जिल्ह्यातून अशीच एक घटना समोर आली आहे. एका विवाहित प्रेयसीच्या ओढीने निघालेल्या तरुणाला आपण मृत्यूच्या सापळ्यात अडकणार आहोत, याची पुसटशीही कल्पना नव्हती. 'घरी कोणी नाही आहे, तू ये इकडे' हा तिने दिलेला संदेश विजय निषाद नावाच्या तरुणासाठी घातक ठरला. या एका चुकीच्या निर्णयामुळे त्याचा संपूर्ण संसार तर उध्वस्त झालाच, पण समाजमन सुन्न करणारी एक गुन्हेगारी कथा समोर आली.
फतेहपूरच्या टिकरा गावातील विजय निषाद हा तरुण ८ मे रोजी नेहमीप्रमाणे घरातून बाहेर पडला. सुरुवातीला तो काही कामासाठी गेला असावा आणि नेहमीप्रमाणे लवकरच घरी परतेल, असा त्याच्या कुटुंबाचा समज होता. मात्र, रात्रीचे अनेक प्रहर उलटले तरी विजयचा काहीच पत्ता नव्हता. कुटुंबाची धाकधूक वाढली आणि त्यांनी सर्वत्र शोध सुरू केला. अनेक दिवस नातेवाईक आणि मित्रांकडे चौकशी करूनही जेव्हा विजयचा सुगावा लागला नाही, तेव्हा अखेर हताश होऊन कुटुंबाने पोलीस ठाण्यात तो बेपत्ता असल्याची तक्रार नोंदवली. येथूनच एका सस्पेन्स क्राईम थ्रिलर सिनेमासारख्या तपासाची चक्रे फिरू लागली.
सुरुवातीला हा केवळ बेपत्ता झाल्याचा साधा गुन्हा वाटत होता. परंतु तपासादरम्यान विजयच्या कुटुंबीयांनी पोलिसांना एक अत्यंत महत्त्वाचा दुवा दिला. विजय हा एका विवाहित महिलेच्या संपर्कात असल्याची शंका त्यांनी व्यक्त केली. पोलिसांनी त्वरित तपासाची दिशा बदलली आणि तांत्रिक विश्लेषणाची मदत घेतली. विजयच्या मोबाईलचे लोकेशन आणि कॉल डिटेल्स रेकॉर्ड (CDR) तपासण्यात आले. याच दरम्यान कानपूरच्या घातमपूर भागातून विजयची दुचाकी पोलिसांना बेवारस अवस्थेत जप्त करण्यात यश आले. या दुचाकीने तपासाला एक मोठी गती दिली. तांत्रिक पुराव्यांवरून स्पष्ट झाले की, विजय हा हमीरपूर येथील रहिवासी असलेल्या किरण देवी या महिलेच्या सातत्याने आणि थेट संपर्कात होता. त्यांच्यात प्रेमसंबंध सुरू होते.
पोलिसांनी कोणताही विलंब न लावता संशयाच्या भोवऱ्यात असलेल्या किरण देवी आणि तिचा पती कामता प्रसाद यांना ताब्यात घेतले. सुरुवातीला दोघांनीही पोलिसांची दिशाभूल करण्याचा प्रयत्न केला, पण जेव्हा पोलिसांनी आपला कडक खाक्या दाखवला आणि तांत्रिक पुरावे समोर ठेवले, तेव्हा आरोपींचा खोटेपणाचा किल्ला कोसळला. त्यांनी गुन्हेगारासारखी गुन्ह्याची कबुली दिली.
पती कामता प्रसादला आपल्या पत्नीच्या आणि विजयच्या प्रेमसंबंधांची माहिती मिळाली होती, ज्यामुळे तो अत्यंत संतप्त होता. या अनैतिक संबंधांचा काटा काढण्यासाठी पतीने पत्नीसोबत मिळून एक भयानक कट रचला. योजनेनुसार किरण देवीने विजयला फोन करून घरी कोणी नाही असे सांगत भेटीचे आमिष दाखवले. प्रेमात आंधळा झालेला विजय कोणतीही शंका न घेता तिच्या घरी पोहोचला, जिथे आधीच त्याचा मृत्यू दबा धरून बसला होता. विजय घरात येताच कामता प्रसाद आणि किरण देवी या दोघांनी मिळून त्याची निर्घृण हत्या केली आणि पुरावे नष्ट करण्याचा प्रयत्न केला. अनैतिक संबंधांच्या ओढीतून सुरू झालेल्या या प्रकरणाचा शेवट भीषण पद्धतीने झाला. पती-पत्नीला अटक करण्यात आली असून, तपास सुरू आहे.
