बालकांच्या लैंगिक शोषणप्रकरणी यूकेमध्ये मूळ गोमंतकीयाला जन्मठेप

मेलबर्न : जगभरातील अनेक बालकांचे लैंगिक शोषण (online child abuse)  केल्याप्रकरणी युनायटेड किंगडम (यूके) येथील न्यायालयाने मूळ गोमंतकीय (Goan-origin) ट्रेव्हर फर्नांडिस (४१ वर्षे)  याला जन्मठेपेची शिक्षा सुनावली.  त्याच्या या कृत्याचे वर्णन न्यायालयाने 'घृणास्पद' आणि 'अभूतपूर्व क्रूरता' असे केले. 

मूळचा गोव्याचा रहिवासी असलेला ट्रेव्हर फर्नांडिस, काही वर्षांपूर्वी यूकेमध्ये (UK)  स्थलांतरीत झाला होता. त्यानंतर २०१५ ते २०२० दरम्यान अनेक अल्पवयीन मुलांना जाळ्यात ओढून त्यांचे शोषण केल्याचे पुढे आले.  याप्रकरणी यूके न्यायालयाने त्याला वरील शिक्षा सुनावली. 

स्विडनमधील एका निवासी पत्त्यावरून तो हे कृत्य करीत होता. राष्ट्रीय गुन्हे अन्वेषण एजन्सीने अमेरिकेतील अधिकारी आणि क्राऊन प्रॉसिक्युशन सर्व्हिस यांच्या सहकार्याने केलेल्या व्यापक आंतरराष्ट्रीय तपासानंतर ट्रेव्हरचे गुन्हे उघडकीस आले. 

अमेरिकेतील कायद्याची अंमलबजावणी करणाऱ्या यंत्रणांनी एका अल्पवयीन मुलाशी संबंधित संशयापस्द ऑनलाईन हालचाली ओळखल्यानंतर हा तपास सुरू झाला. आणि यूकेपर्यंत पोहोचला. त्यातून अखेरीस फर्नांडिसच्या गुन्हेगारीचे स्वरूप उघडकीस आले. 

अधिकाऱ्यांनी दिलेल्या माहितीनुसार; अमेरिकेतील एका तरुण पीडितेने या शोषणाची तक्रार केल्यामुळे तिच्या धाडसामुळे हे एकूण प्रकरण उघडकीस आले. अन्यथा फर्नांडिस कदाचित कोणाच्याही लक्षात न येता गुन्हे करीत राह‌िला असता; अशी माहिती तपासकर्त्यांनी दिली. 

कायद्याची अंमलबजावणी करणाऱ्या संस्थांनी या प्रकरणातील आंतरराष्ट्रीय सहकार्याची प्रशंसा केली आणि नमूद केले की, अनेक अधिकार क्षेत्रांमधील अधिकाऱ्यांनी पीडितांना ओळखण्यासाठी आणि न्याय मिळवून देण्यासाठी अथक परिश्रम घेतले. या व्यापक तपासाचा भाग म्हणून जगभरातील शेकडो व्यक्तींची ओळख पटवण्यात आली आणि त्यांचे संरक्षण करण्यात आले.

२०२२ मध्ये १४ वर्षांची शिक्षा 

बाल शोषणाशी संबंधित अनेक गुन्ह्यांमध्ये दोषी ठरल्यानंतर त्याला २०२२ मध्ये १४ वर्षांच्या तुरुंगवासाची शिक्षा सुनावण्यात आली होती. तथापि, डिजिटल उपकरणांच्या न्यायवैद्यक विश्लेषणासह केलेल्या पुढील तपासात, गुन्हेगारीचे एक अधिक व्यापक स्वरूप उघड झाले. त्यामुळे यूके, अमेरिका, कॅनडा, आयर्लंड आणि नॉर्वे येथील पीडितांशी संबंधित अतिरिक्त ६७  आरोप दाखल करण्यात आले. 

आरोपीने गुन्हा कबूल केला

स्विंडन क्राउन न्यायालयात फर्नांडिसने खंडणी, अल्पवयीन मुलांना लैंगिक कृत्यांसाठी प्रवृत्त करणे, आणि अश्लील छायाचित्रे बाळगणे व वितरित करणे यासह इतर सर्व आरोपांमध्ये आपला गुन्हा कबूल केला. त्यानंतर त्याला जन्मठेपेची शिक्षा सुनावण्यात आली.