पणजी : चिंबल येथे आयोजित करण्यात आलेल्या ग्रामसभेत आज नवा वाद निर्माण झाला . ज्या जागेवर ही ग्रामसभा पार पडली, ती जागा आपली खासगी मालमत्ता असतानाही प्रशासनाने कोणतीही पूर्वपरवानगी न घेता तिचा वापर केल्याचा आरोप जमीन मालकाने केला आहे. या प्रकारामुळे जमीन मालकाने सरपंच आणि संबंधित अधिकाऱ्यांना धारेवर धरत प्रशासकीय कारभारावर प्रश्नचिन्ह उपस्थित केले आहे.
मिळालेल्या माहितीनुसार, रविवारी चिंबल पंचायत क्षेत्रातील ग्रामसभा पार पडली. मात्र, या सभेसाठी निवडलेली जागा एका खासगी मालकीची होती. जमीन मालकाने सभेच्या ठिकाणी उपस्थित राहून अधिकाऱ्यांना या जमिनीच्या मालकी हक्काबाबत जाब विचारला. ही आमची खासगी मालमत्ता आहे आणि परवानगीशिवाय तिचा वापर करणे कायदेशीररित्या चुकीचे आहे," अशा शब्दांत त्यांनी आपला संताप व्यक्त केला.
जमीन मालकाने पुढे स्पष्ट केले की, त्यांच्या कुटुंबाने आजवर नेहमीच ग्रामसभेसारख्या सार्वजनिक उपक्रमांना सहकार्य केले आहे. मात्र, किमान लोकशाही आणि शिष्टाचाराचा भाग म्हणून प्रशासनाने जागा वापरण्यापूर्वी मालकाची संमती घेणे आवश्यक होते. संमती न घेता अशा प्रकारे सभा घेणे हा खासगी मालमत्तेच्या अधिकारांचे उल्लंघन असल्याचे त्यांनी नमूद केले.
या अनपेक्षित वादामुळे ग्रामसभेत काही काळ तणावाचे वातावरण निर्माण झाले होते. प्रशासनाने यावर अद्याप कोणतीही अधिकृत प्रतिक्रिया दिलेली नाही, मात्र खासगी जागेवर सार्वजनिक सभा घेताना होणाऱ्या अशा चुकांमुळे पंचायत प्रशासनाच्या कार्यक्षमतेवर टीका होत आहे.
