सुरक्षा नियम, अटी अधिक कडक
पणजी : गोव्यात पॅराग्लायडिंग तसेच इतर हवाई क्रीडा (एरो स्पोर्ट्स) प्रकारांमध्ये सहभागी होण्यासाठी आता पर्यटकांना हमीपत्र देणे सक्तीचे करण्यात आले आहे. अल्पवयीन मुलांच्या बाबतीत संबंधित पालकांना हे हमीपत्र द्यावे लागणार आहे. पर्यटन खात्याने या संदर्भात अधिसूचना जारी केली असून, पॅराग्लायडिंग आणि एरो स्पोर्ट्ससाठीचे नियम निश्चित केले आहेत.
नव्या नियमांमध्ये ऑपरेटरांनी घ्यावयाच्या सुरक्षा उपाययोजना, आकारावयाचे शुल्क, तसेच नियमांचे उल्लंघन झाल्यास आकारण्यात येणारा दंड यांचा समावेश आहे. मागील काळात पॅराग्लायडिंगदरम्यान अपघात होऊन पर्यटकांचा मृत्यू झाल्याच्या घटना घडल्या होत्या. या पार्श्वभूमीवर पर्यटन खात्याने नोंदणी शुल्कात वाढ करतानाच सुरक्षा नियम आणि अटी अधिक कडक केल्या आहेत. ऑपरेटर तसेच कर्मचाऱ्यांसाठी प्रशिक्षण सक्तीचे करण्यात आले असून, सुरक्षा नियमांचे पालन न केल्यास दंडात्मक कारवाईची तरतूद करण्यात आली आहे.
ऑपरेटरांवर जबाबदारी
नवीन नियमांनुसार, जो पर्यटक किंवा अन्य व्यक्ती पॅराग्लायडिंग अथवा एरो स्पोर्ट्समध्ये सहभागी होऊ इच्छितो, त्याने संबंधित ऑपरेटरला हमीपत्र देणे अनिवार्य आहे. हमीपत्र घेतल्याशिवाय कोणत्याही व्यक्तीस अशा साहसी क्रीडा प्रकारांत सहभागी करून घेऊ नये, अशी सक्त ताकीद ऑपरेटरांना देण्यात आली आहे. तसेच, ऑपरेटरांनी ही हमीपत्रे सुरक्षितपणे जतन करून ठेवणे आवश्यक आहे.
