अमरनाथ पणजीकर : प्रदूषण मंडळाच्या कारभारावर ताशेरे
पणजी : प्रदूषण नियंत्रण मंडळाने लग्न सोहळ्यातील संगीतासाठी रात्री १० वाजेपर्यंतच मुदत दिली आहे. मात्र, राज्यातील ख्रिस्ती समुदायातील लग्नाचे विधी उशिरापर्यंत सुरू असतात. त्यामुळे अशा लग्न सोहळ्यांत संगीत वाजवण्यासाठी रात्री ११.३० किंवा मध्यरात्री १२ वाजेपर्यंत परवानगी द्यावी, अशी मागणी काँग्रेस नेते अमरनाथ पणजीकर यांनी केली आहे.
पणजी येथे आयोजित पत्रकार परिषदेत बोलताना पणजीकर यांनी प्रदूषण मंडळाच्या दुट्टप्पी भूमिकेवर सडकून टीका केली. राज्यात क्लब आणि बारमध्ये सर्रास ध्वनी प्रदूषण होत असून, कोळशामुळे धुळीचे आणि नद्यांमध्ये जलप्रदूषण वाढत आहे. या गंभीर बाबींकडे दुर्लक्ष करणाऱ्या मंडळाला केवळ लग्न सोहळ्यातील ध्वनी प्रदूषण दिसत आहे का, असा सवाल त्यांनी उपस्थित केला.
| विषय | प्रमुख मागणी / आक्षेप |
|---|---|
| वेळेची मर्यादा | रात्री १० ऐवजी ११.३० किंवा १२ वाजेपर्यंत सवलत द्यावी. |
| सांस्कृतिक परंपरा | ख्रिस्ती समुदायाचे विधी उशिरापर्यंत असल्याने नियमांमुळे अडथळा. |
| दुट्टप्पी धोरण | क्लब आणि बारमधील ध्वनी प्रदूषणावर कारवाईची मागणी. |
| राजकीय टीका | सरकारमधील ख्रिस्ती आमदार व मंत्र्यांच्या मौनावर प्रश्नचिन्ह. |
कडक ध्वनी मर्यादेमुळे ख्रिश्चन समाजातील लग्न समारंभांवर प्रतिकूल परिणाम होणार आहे. सांस्कृतिक परंपरांचा विचार न करता असे नियम लागू केल्यास ख्रिस्ती कुटुंबांना अनावश्यक त्रास सहन करावा लागेल. नियमांचा उद्देश समाजाला हानीकारक असलेल्या बाबींवर नियंत्रण ठेवणे हा असायला हवा, पिढ्यान-पिढ्या चालत आलेल्या परंपरा मोडण्यासाठी नव्हे, असे मत त्यांनी व्यक्त केले.
प्रदूषण नियंत्रण मंडळाच्या या आदेशाला सरकारमधील ख्रिस्ती आमदार तसेच मंत्र्यांनी विरोध करणे अपेक्षित होते. मात्र ते गप्प बसले आहेत. यावरूनच भाजप सरकार आणि त्यांचे मंत्री लोकभावनांबाबत असंवेदनशील असल्याचे स्पष्ट होते, अशी टीका पणजीकर यांनी केली. याप्रकरणी सार्वजनिक हिताचा विचार करून तातडीने निर्णय घेण्याची मागणी काँग्रेसतर्फे करण्यात आली आहे.
