आठवड्याभरातील गोव्यातील आगीची चौथी घटना; हडफडेतील दुसरी दुर्घटना
पणजी : बागा-हडफडे परिसरात असलेल्या एका चार-तारांकित रिसॉर्टजवळ आज, रविवार सकाळी ११ वाजून ४ मिनिटांच्या सुमारास आगीची भीषण घटना घडली. रिसॉर्टसाठी वापरले जाणारे दोन मोठे डिझेल जनरेटर या आगीत जळून खाक झाले. जनरेटरवर अतिरिक्त भार (Overloading) पडल्यामुळे शॉर्ट सर्किट होऊन ही आग लागल्याचा प्राथमिक अंदाज वर्तवण्यात येत आहे.
अग्निशमन दलाची तत्परता
या आगीची माहिती मिळताच पिळर्ण येथील अग्निशमन दलाच्या कर्मचाऱ्यांनी तातडीने घटनास्थळ गाठले. आगीची तीव्रता जास्त असल्याने, त्यांनी म्हापसा अग्निशमन दलाच्या पथकाला मदतीसाठी बोलावले. फायर फायटर सुरज शेटगावकर यांच्या नेतृत्वाखालील मापुसा पथक त्वरित घटनास्थळी दाखल झाले.
आगीत दोन्ही जनरेटर पूर्णपणे वेढले गेले होते. जवळच्या इमारतींना आणि पर्यटकांनी गजबजलेल्या परिसराला धोका लक्षात घेऊन, रिसॉर्ट कर्मचाऱ्यांच्या मदतीने अग्निशमन दलाच्या जवानांनी वेगाने पाणी मारून आगीवर नियंत्रण मिळवले. त्यांच्या तत्पर कारवाईमुळे आग हॉटेलच्या मुख्य इमारतींमध्ये पसरली नाही आणि मोठी दुर्घटना टळली. या घटनेत कोणतीही जीवितहानी झाली नसून, सुमारे १० लाख रुपयांचे नुकसान झाले असल्याचा प्राथमिक अंदाज आहे.
आठवड्याभरात आगीच्या घटनांची मालिका
दरम्यान, गोव्यात आठवड्याभरात आगीची ही चौथी तर बागा-हडफडे परिसरातील दुसरी मोठी घटना आहे.
या पूर्वी घडलेल्या प्रमुख घटना:
१) हडफडे क्लब दुर्घटना: मध्यरात्री 'बर्च बाय रोमिओ लेन' (Birch by Romeo Lane) या क्लबमध्ये 'कोल्ड पायरो' (Cold Pyro) मुळे लागलेल्या भीषण आगीत २५ जणांचा हकनाक बळी गेला होता.
२) कला अकादमीतील आग: त्यानंतर पणजीतील कला अकादमीच्या आवारात 'सेरेंडिपीटी' (Serendipity) महोत्सवासाठी उभारण्यात येत असलेल्या सजावटीच्या साहित्यावर वेल्डिंगची ठिणगी पडून आग लागल्याची घटना घडली. येथे सुरक्षारक्षकांनी प्रसंगावधान राखून अवघ्या चार मिनिटांत आगीवर नियंत्रण मिळवल्याने मोठी दुर्घटना टळली.
३) वेर्णात भंगार अड्ड्याला आग: शुक्रवार, १२ डिसेंबर रोजी दुपारी वेर्णा औद्योगिक वसाहतीमधील एका खाजगी भंगार अड्ड्याला आग लागली होती. या आगीतील नुकसानीचा नेमका अंदाज अद्याप स्पष्ट झालेला नाही.
