पणजी : रामा काणकोणकर यांनी आधी दिलेल्या जबाबात कोणत्याही राजकारण्याच्या सहभागाचा दावा केला नव्हता. त्यांनी नव्याने केलेल्या दाव्यांनुसार, चौकशी केली जाईल. रामा आणि त्याच्या कुटुंबीयांना पोलीस सुरक्षा देण्यात आली आहे अशी माहिती उत्तर गोवा पोलीस अधीक्षक राहुल गुप्ता यांनी दिली.
सामाजिक कार्यकर्ता रामा काणकोणकर यांना शनिवारी बांबोळी येथील गोवा वैद्यकीय महाविद्यालय इस्पितळातून डिस्चार्ज देण्यात आला. त्यावेळी त्यांनी त्यांची त्यांच्यावर झालेल्या हल्ल्यासंदर्भात दोन मंत्र्यांचा हात असल्याची शंका व्यक्त केली होती. या संदर्भात तपासाची माहिती देण्यासाठी पोलीस महासंचालक आलोक कुमार यांनी पत्रकार परिषद घेतली. त्यावेळी अधीक्षक गुप्ता यांनी वरील माहिती दिली. उपअधीक्षक तथा तपास अधिकारी सुदेश नाईक आणि निरीक्षक विजयकुमार चोडणकरदेखील उपस्थित होते.
करंझाळे येथे १८ सप्टेंबर रोजी काणकोणकर यांच्यावर प्राणघातक हल्ला झाला होता. पणजी पोलिसांनी गुन्हा दाखल करून या प्रकरणात सहभाग असलेल्या सराईत गुन्हेगार अँथनी नादार, फ्रान्सिस नादार, मिंगेल आरावजो, मनीष हडफडकर, सुरेश नाईक, फ्रांको डिकॉस्टा आणि साईराज गोवेकर या सात संशयितांना अटक केली. त्यानंतर त्यातील काही संशयितांनी दिलेल्या जबानीची दखल घेऊन पोलिसांनी २१ सप्टेंबर रोजी सराईत गुंड जेनिटो कार्दोझ याला अटक केली. यानंतर अनेकदा काणकोणकरचा जबाब नोंद करण्याचा पोलिसांनी आणि जिल्हादंडाधिकाऱ्यांनी प्रयत्न केला. पण त्याने जबाब देण्यास नकार दिला.
त्यानंतर अखेर २ ऑक्टोबर रोजी रामा काणकोणकर यांनी पोलिसांना जबाब दिला. त्यात त्यांनी मिंगेल आरावजो हा आपला पाठलाग करत असल्याचे, तसेच मारहाण करताना हल्लेखोरांनी आपल्याला ‘गावडा’ आणि ‘राखणदार’ म्हटल्याचे आपल्या जबाबात सांगितले. याची दखल घेऊन पोलिसांनी गुन्ह्यात अनुसूचित जाती आणि अनुसूचित जमाती (छळ प्रतिबंध) कायद्याअंतर्गत कलम जोडण्यात आले. तसेच प्रकरणाचा तपास पोलीस उपअधीक्षक सुदेश नाईक याच्याकडे वर्ग करण्यात आले. याच दरम्यान सराईत गुंड जेनिटो कार्दोझ याने न्यायालयात जामीन अर्ज दाखल केला. त्याला काणकोणकर यांनी विरोध करून न्यायालयात अर्ज दाखल केल्याची माहिती पोलीस अधीक्षक राहुल गुप्ता यांनी दिली.
दरम्यान शनिवार ११ रोजी रामा काणकोणकर यांना इस्पितळातून डिसचार्ज दिल्यानंतर त्यांनी दोन राजकारणी आपल्या हल्ला मागे असल्याची शंका व्यक्त केली. याची दखल घेऊन अधीक्षक गुप्ता यांनी आवश्यक भासल्यास काणकोणकर यांच्या पुन्हा पुरवणी जबाब नोंद केला जाईल तसेच काणकोणकरला न्यायदंडाधिकाऱ्यासमोर जबाब नोंद करण्याची तरतूद असल्याची माहिती दिली.
रामा काणकोणकर याच्यावर झालेल्या हल्लाचा तपास गुणवत्तेनुसार, केला जात आहेत. तसेच आतापर्यंत आठ जणांवर कारवाई करण्यात आली आहे. त्यातील जेनिटो कार्दोझ याने न्यायालयात जामीन अर्ज दाखल केला आहे. त्याला आम्ही विरोध केला आहे. दरम्यान काणकोणकर याच्या जबाबाची व्हिडिओ रेकॉर्डिंग करण्यात आली आहे. त्यावेळी त्यांनी राजकारण्याच्या सहभाग संदर्भात कोणतेही माहिती दिलेली नाही. दरम्यान काल त्यांनी केलेल्या दाव्यानुसार, चौकशी केली जाईल. तसेच यासंदर्भात पुढे येणाऱ्या माहितीची चौकशी केली जाईल.
: तपास अधिकारी तथा पोलीस उपअधीक्षक सुदेश नाईक
रामा काणकोणकर यांचा जबाब नोंद करण्यात आला होता. मात्र त्याने इस्पितळातून डिस्चार्ज मिळाल्यानंतर गंभीर दावा केला आहे. या प्रकरणात आतापर्यंत पोलिसांनी निष्पक्ष आणि जलद चौकशी केली आहे. मात्र वरील केलेल्या दाव्याची सत्यता तपासण्यासाठी पोलीस तपास करण्यात येईल.
: पोलीस महासंचालक आलोक कुमार
