मद्यसाठा जप्ती प्रकरण: व्हॅलिना व्हेंचर्सची उच्च न्यायालयात धाव

प्रतिनिधी। गोवन वार्ता

पणजी: हरियाणातील **व्हॅलिना व्हेंचर्स प्रायव्हेट लिमिटेड** या मद्य वितरक कंपनीच्या गोव्यात जप्त केलेल्या उच्च दर्जाच्या मद्यसाठ्याच्या प्रकरणाने नवे वळण घेतले आहे. कस्टमच्या देखरेखीखाली हा साठा निर्यातीसाठी आणला असल्याचा दावा कंपनीने केला आहे. गोवा अबकारी खात्याने केलेल्या जप्ती आणि नोटीसविरोधात कंपनीने गोवास्थित मुंबई उच्च न्यायालयात याचिका दाखल केली आहे. यात साठा सोडवण्यासोबतच अबकारी खात्यावर दंडात्मक कारवाईची मागणीही करण्यात आली आहे.

व्हॅलिना व्हेंचर्स प्रायव्हेट लिमिटेड कंपनीने जप्त केलेला मद्यसाठा त्वरित सोडवण्याची मागणी केली आहे. याशिवाय, अबकारी खात्याने जारी केलेली कारणे दाखवा नोटीस रद्द करावी आणि कंपनीची बदनामी केल्याबद्दल अबकारी खात्यावर दंडात्मक कारवाई करावी, अशी मागणीही याचिकेत करण्यात आली आहे. कंपनीने या संदर्भात राज्य सरकार, गोवा अबकारी खात्याचे आयुक्त आणि गोवा कस्टम आयुक्तांना प्रतिवादी केले आहे.

काय आहे प्रकरण?

गोवा अबकारी खात्याने **६ मे रोजी** पेडणे तालुक्यातील पत्रादेवी चेक पोस्टवर हरियाणातून आणलेला उच्च दर्जाच्या मद्यसाठ्याचा एक ट्रक अडवून मोठ्या रॅकेटचा पर्दाफाश केल्याचा दावा केला होता. हा अवैध मद्याचा साठा गोव्यात आणून कर बुडवण्याचा प्रयत्न सुरू असल्याचा आरोप खात्याने केला होता. जप्त केलेल्या ट्रकमध्ये **चिव्हास रिगल, अब्सोल्यूट व्होडका, जॉनी वॉकर, ब्लॅक लेबल** यांसारख्या उच्च ब्रँडच्या मद्याच्या बाटल्या होत्या, ज्याची किंमत सुमारे **७८ लाख रुपये** आहे. मद्याची वाहतूक करण्यासाठी चालकाकडे आवश्यक परवानगी नसल्याचा आणि मद्याच्या बाटल्यांवर लेबल नसल्याचा दावा करत अबकारी खात्याने ट्रक चालकासह मद्यसाठा जप्त केला होता. त्यानंतर, **१४ मे रोजी** अबकारी खात्याने व्हॅलिना व्हेंचर्स प्रायव्हेट लिमिटेड कंपनीला कारणे दाखवा नोटीस बजावून त्यांचा परवाना रद्द करण्याचा इशारा दिला होता.

कंपनीच्या म्हणण्यानुसार, त्यांना **९ मार्च रोजी** भारत सरकारच्या मुंबई येथील अतिरिक्त परराष्ट्र व्यापार महासंचालकांनी आयातदार-निर्यातकर्ता कोड (आयईसी) जारी केला होता. त्यानंतर, गोवा कस्टम आयुक्तांनी पिळर्ण येथील **‘नाईटींथ सँच्युरी स्परिट’ प्रायव्हेट लिमिटेड** कंपनीच्या गोदामाला बाँडेड वेअरहाऊसची मंजुरी दिली. यानंतर, कंपनीने **१६ एप्रिल रोजी** गुरुग्राम येथील कस्टम उपायुक्तांकडून मद्यसाठा गोव्यात हस्तांतरित करण्याची परवानगी मिळवली. **३० एप्रिल रोजी** कंपनीने हरियाणा येथील **डिस्कव्हरी बेव्हरेजेस प्रायव्हेट लिमिटेड** कंपनीकडून ७८ लाख रुपयांचा मद्यसाठा खरेदी केला. हा मद्यसाठा गुरुग्राम कस्टम आयुक्तांच्या देखरेखीखाली गोव्यात पाठवण्यात आला होता. हा साठा गोव्यातील कस्टम आयुक्तांकडून तपासणी होऊन पिळर्ण येथील गोदामात साठवला जाणार होता आणि त्यानंतर आवश्यक मंजुरी मिळाल्यावर त्याची निर्यात केली जाणार होती.

कंपनीचा दावा, न्यायालयात धाव

या प्रकरणी कंपनीने **१३ मे रोजी** अबकारी खात्याला लेखी पत्रव्यवहार करून संबंधित मद्यसाठा कस्टमच्या देखरेखीखाली गोव्यात आणल्याचा दावा केला होता आणि त्यासंबंधीचे सर्व आवश्यक दस्तऐवज सादर केले होते. असे असतानाही अबकारी खात्याने **१४ मे रोजी** कारणे दाखवा नोटीस बजावल्याने कंपनीने उच्च न्यायालयात धाव घेतली आहे.