मुख्यमंत्री : रोटरी क्लब, वन वर्ल्ड गोवातर्फे मोफत लसीकरण
पणजी : महिलांमध्ये सर्व्हायकल कॅन्सर होण्याची शक्यता अधिक असते. सध्या याबाबतची प्रतिबंधात्मक ‘एचपीव्ही’ लस उपलब्ध झाली आहे. या लसीची यशस्वीरित्या चाचणी झाली आहे. त्यामुळे या लसीबाबत कोणतेही गैरसमज बाळगू नये, असे आवाहन मुख्यमंत्री डॉ. प्रमोद सावंत यांनी केले.
रोटरी क्लब ऑफ पणजी आणि वन वर्ल्ड गोवा यांच्यातर्फे आयोजित मोफत लसीकरण कार्यक्रमात शनिवारी ते बोलत होते. यावेळी डॉ. केदार फडते, डॉ. वंदना धुमे, गौरीष धोंड व अन्य पदाधिकारी उपस्थित होते.
मुख्यमंत्री म्हणाले की, कोविड लसीकरणावेळी त्या लसीबद्दल चुकीच्या कल्पना तयार झाल्या होत्या. आता देखील काही जणांचे सर्व्हायकल कॅन्सरच्या लसीबाबत गैरसमज झाले आहेत. या लसीचे काम समजून न घेता चुकीच्या माहितीच्या आधारे हे समज तयार होत आहेत. लस घेतल्यामुळे अमुक काहीतरी होईल असे सांगितले जाते. मात्र, हे चुकीचे असून विविध डॉक्टरांनी देखील ही लस खात्रीशीर असल्याचे सांगितले आहे.
ते म्हणाले, ही लस चांगली असल्याचे केंद्र सरकारने शिक्कामोर्तब केले आहे. भविष्यात केंद्र सरकारच्या आरोग्य उपक्रमात या लसीचा अंतर्भाव केला जाणार आहे. त्यावेळी ही लस मोफत देण्याचा केंद्राचा विचार आहे. पूर्वी अनेकांना पोलिओ होत होता. मात्र, लसीकरण उपक्रमामुळे आता भारत पोलिओ मुक्त झाला आहे. त्याचप्रमाणे सर्व्हायकल कॅन्सरसाठी आतापासून लसीकरण सुरू केल्यास पुढील काही वर्षात हा रोग होणार नाही. त्यामुळे याविषयी गैरसमज न ठेवता लस घेणे आवश्यक आहे.
जिभेवर ताबा ठेवा
आरोग्य चांगले ठेवण्यासाठी लसीकरण महत्त्वाचे आहे. तरीही नियमित व्यायाम आणि योग्य आहार हे देखील तितकेच महत्त्वाचे आहे. बाहेरचे जंक फूड खाल्ल्याने देखील अनेक आजारांना निमंत्रण मिळते. त्यामुळे आपल्या जिभेवर ताबा ठेवणे आवश्यक आहे, असे मुख्यमंत्री प्रमोद सावंत यांनी सांगितले.
