सुभाष वेलिंगकर : जनजागरण अभियानाचा प्रारंभ मांद्रे विभागातून
मराठी राजभाषा निर्धार समितीच्या बैठकीत बोलताना प्रा. सुभाष वेलिंगकर.
पणजी : गेली ४० वर्षे मराठीवर होत असलेल्या अन्यायाबाबत संपूर्ण गोव्यात 'जनजागरण अभियान' येत्या शनिवार दि. २६ एप्रिलपासून सुरू करण्याचा निर्णय मराठी राजभाषा निर्धार समितीच्या सोमवारी झालेल्या सुकाणू बैठकीत घेण्यात आल्याचे सुभाष वेलिंगकर यांनी सांगितले. गोमंतक मराठी अकादमीच्या मराठी भवनामध्ये झालेल्या या बैठकीचे संचालन राज्य निमंत्रक प्राचार्य सुभाष भास्कर वेलिंगकर आणि ज्येष्ठ मार्गदर्शक गो.रा. ढवळीकर यांनी केले.
या जनजागरण अभियानाचा श्रीगणेशा शनिवारपासून मांद्रे प्रखंडातून करण्याचे ठरले आहे. अभियान व्यापक करण्यासाठी संघटनात्मक रचना १२ सरकारी तालुक्यांऐवजी, भौगोलिकदृष्ट्या सोयीचे असे १८ प्रखंडांची रचना करून पहिल्या टप्प्यात एप्रिल, मे व जून या तीन महिन्यांत सर्व १८ प्रखंडांत मराठीप्रेमींचे ‘प्रखंड मेळावे’ आयोजित करण्यात येतील. या प्रखंड मेळाव्यात सर्वसमावेशक अशा व्यापक ‘प्रखंड समित्या’ स्थापन करण्यात येतील.
सुकाणू बैठकीत ‘मराठी राजभाषा निर्धार समिती’ ची एकंदर भूमिका आणि वैचारिक धोरण काय असावे, याबद्दल चर्चा होऊन त्यात प्रारंभी सुभाष वेलिंगकर यांनी मार्गदर्शक विचार मांडले. प्रदीप घाडी आमोणकर, प्रा. नारायण महाले, डाॅ. अनुजा जोशी, विजय नाईक, गोविंद देव, गो. रा. ढवळीकर, प्राचार्य गजानन मांद्रेकर, अनुराधा मोघे, गुरुदास सावळ, नितीन फळदेसाई यांनी सहभाग घेतला.
मेळाव्यातच आंदोलनाची कृती-योजना होणार जाहीर
या प्रखंड मेळाव्यातच आंदोलनाची कृती-योजना पहिल्या टप्प्यात प्रखंड स्तरावर कार्यान्वित होईल. निर्धार मेळाव्यात सर्व तालुक्यातील प्रमुख कार्यकर्त्यांकडे सुपूर्द करण्यात आलेल्या ‘आवाहन पत्रां’ चे वितरण प्रखंड मेळाव्यांतून करण्यात येईल.
