तर तिन्ही संशयितांना सशर्त जामीन मंजूर
म्हापसा : सेंट मायकल वाडा, हणजूण येथे बेकायदेशीररित्या घरात घुसून ब्रॉन्विन सिनारी कुटूबियांना घरातून हाकलून लावल्या प्रकरणी अटक केलेल्या तिन्ही संशयित बाऊन्सर्सची म्हापसा न्यायालयाने सशर्त जामिनावर सुटका केली. तर मुख्य संशयित जनार्दन खोराडे याचा अटकपुर्व जामीन अर्ज न्यायालयाने फेटाळून लावला.
सोमवारी दि. १७ रोजी संशयित आरोपी राकेश नंदकिशोर राहा (३६, रा. साखळी व मूळ उत्तरप्रदेश), परशुराम शंकर गावस (४२, रा. वाडी नादोडा, बार्देश) व विकी विजय नाईक (२०, इल्हास, जुने गोवे) या तिघांचा जामीन अर्ज सुनावणी झाली. त्यानंतर म्हापसा प्रथमश्रेणी न्यायालयाने तिघांचीही सशर्त जामिनावर सुटका केली.
दरम्यान, संशयित जनार्दन खोराडे याच्या अटकपुर्व जामिनावर सोमवारी १७ रोजी म्हापसा अतिरिक्त जिल्हा व सत्र न्यायालयात सुनावणी झाली. पोलीस व संशयिताची बाजू ऐकल्यानंतर न्यायालयाने हा अटकपुर्व जामीन अर्ज फेटाळून लावला.
दरम्यान, हा प्रकार गेल्या शनिवार दि. ८ फेब्रुवारी रोजी सकाळी १०.४५ च्या सुमारास घडला होता. याप्रकरणी सोमवारी दि. १० रोजी हणजूण पोलिसांनी जनार्दन खोराटे व अज्ञात १५ ते २० जणांविरूध्द भा.न्या.सं.च्या १८९(२), १९१(२), ३२९ (४), ३३१(३), ३०५, ३५१(४) गुन्हा दाखल केला होता. नंतर या गुन्ह्याखाली वरील तिघा संशयितांना अटक केली होती.
दररम्यान, कॅनडास्थितीत मायकल पीटर या विदेशी नागरिकाच्या मालकीच्या घरात फिर्यादी ब्रॉन्विन सिनारी, पती राजेंद्र सिनारी व कुटूंबिय वास्तव्यास होते. घटनेच्यावेळी आपण मालमत्तेचा मुखत्यारपत्रधारक (पॉवर ऑफ अॅटर्नी) असल्याचा दावा करीत संशयित जनार्दन खोराडे यांनी १५ ते २० लोकांच्या सहाय्याने घरात घुसखोरी केली. त्यानंतर कुटूंबियांना धमकावून घरातील सामान बाहेर काढले.
यातील वॉशिंग मशीन, लॅपटॉप, प्रिंटर, सुटकेस, इलेक्ट्रॉनिक्स आणि घरगुती वस्तू तसेच ३ लाख रूपये रक्कम अशा मुद्देमालाची चोरी केल्याचा आरोप या तक्रारीत फिर्यादींनी केला होता. दरम्यान, गेल्या दि. शुक्रवारी १४ रोजी हे प्रकरण हणजुण पोलिसांकडून पुढील चौकशीसाठी गुन्हा शाखेकडे वर्ग करण्यात आले होते. याप्रकरणी पुढील तपास गुन्हा शाखेचे पोलीस निरीक्षक निनाद देऊलकर करीत आहेत.
