सस्पेन्स, कुतूहलाने भरलेले वातावरण आणि जोडीला वेगवेगळ्या रागांमधले संगीत यांचे मिश्रण
‘कांतारा’ चित्रपटाच्या अफाट यशानंतर त्याचा दुसरा भाग येण्याच्या आतुरतेने वाट पाहणाऱ्या प्रेक्षकांसाठी आनंदाची बातमी मिळतेय. आता लवकरच या चित्रपटाचा दुसरा भाग प्रेक्षकांच्या भेटीला येणार असून या चित्रपटाचे निर्माते ‘कांतारा भाग १’ घेऊन येत आहेत. चित्रपटाची घोषणा झाल्यानंतर चित्रपटाचा फर्स्ट लूक व टीझर प्रदर्शित करण्यात आला. या टीझरमध्ये अभिनेता, दिग्दर्शक ऋषभ शेट्टीचा अगदी वेगळाच अंदाज पाहायला मिळाला आहे. टीझर पाहिल्यानंतर चित्रपटाचा येणारा भाग नक्कीच उत्सुकता वाढवणारा आहे. हा टीझर सोशल मीडियावर व्हायरल होत आहे. यावर जोरदार कमेंट्सही केल्या जात आहे. 
टीझरच्या सुरुवातीला अभिनेता ऋषभ हातात मशाल घेऊन घनदाट जंगलात कोणत्या तरी गोष्टीचा पाठलाग करत असलेला दिसत आहे. पुढे ती गोष्ट गायब होते आणि तो अचानाक थांबतो. तो ज्या ठिकाणी थांबतो त्या ठिकाणी आगीचे वर्तुळ पाहायला मिळतेय. या टीझरमध्ये ऋषभ शेट्टीच्या एका अभूतपूर्व अवताराची झलक दिसते. सस्पेन्स, कुतूहलाने भरलेले वातावरण आणि जोडीला वेगवेगळ्या रागांमधले संगीत यांचे मिश्रण यामुळे हा चित्रपट अभूतपूर्व कामगिरी करेल यात शंका नाही. 
'कांतारा' हा चित्रपट मागच्या वर्षी प्रदर्शित झाला. या चित्रपटाने प्रदर्शित झाल्यानंतर बॉक्स ऑफिसवर धमाका केला. अवघ्या १६ कोटींमध्ये बनलेला हा चित्रपट प्रेक्षकांना इतका आवडला की, या चित्रपटाने ४०० ते ४५० कोटींची कमाई केली. या चित्रपटानंतरच ऋषभ शेट्टीला ग्लोबल स्टारचा दर्जा मिळाला आणि आता 'कांतारा द लीजेंड १ 'च्या माध्यमातून ऋषभ शेट्टीला चांगली पसंती मिळेल यात काही शंका नाही.
