‘कांगुवा’ची बॉक्स ऑफिसवर शानदार ओपनिंग
‘कांगुवा’मधील बॉबी देओलचा फर्स्ट लूक व्हायरल झाल्यापासून त्याचे चाहते या चित्रपटाची आतुरतेने वाट पाहत होते. चित्रपट १४ नोव्हेंबर रोजी चित्रपटगृहात दाखल झाला असून बाॅबीचा क्रूर अवतार प्रेक्षकांच्या पसंतीस उतरत आहे. चित्रपटात बाॅबीसोबत साऊथचा सुपरस्टार सूर्यादेखील आहे. अंदाजे ३५० कोटी रुपये खर्चून बनलेल्या या चित्रपटात दिशा पटानीसुद्धा महत्त्वाच्या भूमिकेत आहे. या चित्रपटाला आयएमडीबीवर १० पैकी ९ रेटिंग मिळाले असून दिग्दर्शक शिवाच्या दिग्दर्शनाखाली बनलेल्या या चित्रपटाने पहिल्या दिवशीच धमाकेदार व्यवसाय केला आहे. साऊथचा हा मोस्ट अवेटेड सिनेमा पाच भाषांमध्ये प्रदर्शित करण्यात आला आहे. तमिळ व्यतिरिक्त तो हिंदी, तेलगू, कन्नड आणि मल्याळम भाषेतही प्रदर्शित झाला आहे. ‘कांगुवा’च्या पहिल्याच दिवशी ५ लाख ५३ हजारांहून अधिक तिकिटांची विक्री झाली होती. आगाऊ बुकिंगमध्येच या चित्रपटाने १०.१६ कोटींची कमाई केली होती. ‘कंगुवा’ शुक्रवारपर्यंत ४० कोटींचा व्यवसाय करू शकतो. तर जगभरात बॉक्स ऑफिसवर ६० ते ७० कोटी रुपयांचा गल्ला कमावण्याची शक्यता आहे.
‘कांगुवा’चे पहिल्या दिवसाचे कलेक्शन
चित्रपट रिलीजच्या दिवशी तामिळ आवृत्तीतून ११ ते १३ कोटी रुपयांची कमाई केली आहे. तर तेलुगु व्हर्जनद्वारे ५.५० ते ६ कोटींचा व्यवसाय केला आहे. हिंदी आवृत्तीच्या माध्यमातून या चित्रपटाने ४ कोटी रुपयांचा व्यवसाय केला आहे. गुरुवारी चित्रपटगृहांमध्ये प्रदर्शित झालेल्या या चित्रपटाच्या पहिल्या दिवशी २२ कोटींचा व्यवसाय केला आहे. ‘कांगुवा’ला चेन्नई, पाँडेचेरी आणि कोईम्बतूर येथून उत्तम प्रतिसाद मिळत आहे. या चित्रपटाचे ओपनिंग डे कलेक्शन चांगलेच झाले आहे पण आता चित्रपट हा वेग कायम ठेवू शकेल की नाही हे पाहणे बाकी आहे.
