पंतप्रधान मोदी, १८ राज्यांचे मुख्यमंत्री राहणार उपस्थित; १०-१२ आमदारांना दिली जाणार मंत्रिपदाची शपथ
चंडीगढ : हरियाणात नायब सैनी आज दुसऱ्यांदा मुख्यमंत्रिपदाची शपथ घेणार आहेत. पंचकुला येथील दसरा मैदानावर दुपारी १.१५ वाजता शपथविधी सोहळा होणार आहे. पंतप्रधान नरेंद्र मोदी प्रमुख पाहुणे म्हणून उपस्थित राहणार आहेत. त्यांच्यासोबत १८ राज्यांचे मुख्यमंत्रीही सहभागी होणार आहेत.
यामध्ये अरुणाचल प्रदेश, आंध्र प्रदेश, आसाम, बिहार, छत्तीसगड, गोवा, गुजरात, मध्य प्रदेश, महाराष्ट्र, मणिपूर, मेघालय, नागालँड, ओडिशा, पुद्दुचेरी (UT), राजस्थान, सिक्कीम, त्रिपुरा, उत्तर प्रदेश, उत्तराखंड आणि इतर राज्यांच्या मुख्यमंत्र्यांचा समावेश असेल.
राजकीय व्यक्तींव्यतिरिक्त खेळाडू, उद्योगपती, डॉक्टर, वकील आणि सामाजिक कार्यकर्त्यांनाही या कार्यक्रमासाठी आमंत्रित करण्यात आले आहे. कार्यक्रमाला सुमारे 50 हजार लोक उपस्थित राहणार आहेत, असे भाजपचे राज्य माध्यम प्रभारी अरविंद सैनी यांनी सांगितले.
नायब सैनी यांच्यासह १० ते १२ आमदार मंत्रीपदाची शपथ घेऊ शकतात. यामध्ये अनिल विज, कृष्ण लाल पनवार, राव नरबीर सिंग, महिपाल धांडा, विपुल गोयल, अरविंद शर्मा, श्याम सिंग राणा, रणबीर गंगवा, कृष्णा बेदी, श्रुती चौधरी, आरती राव, राजेश नागर आणि गौरव गौतम यांच्या नावांचा समावेश आहे. नायब सैनी यांनी स्वत: फोन करून याबाबत माहिती दिल्याचे सूत्रांचे म्हणणे आहे. कृष्णलाल मिड्ढा, राम कुमार गौतम, मूलचंद शर्मा यांच्याही नावांची चर्चा आहे.
