लोकसभा निवडणुकीच्या पहिल्या टप्प्यातील मतदान १९ एप्रिलला होत आहे. मतदानाच्या पहिल्या टप्प्यात २१ राज्यांतील १०२ जागांवर मतदान होणार आहे. लोकसभा निवडणुकीत मतदारांच्या सोयीसाठी व्होटर हेल्पलाइन ॲपचा पर्यायही देण्यात आला आहे.
पणजी : शुक्रवारी देशभरात लोकसभेच्या १०२ जागांसाठी मतदान होणार आहे. यावेळी निवडणूक आयोगाने मतदारांच्या सोयीसाठी खास अनेक ॲप्स तयार केले आहेत. निवडणूक आयोगाच्या या ॲप्सद्वारे तुम्ही तुमचे नाव मतदार यादीत आहे की नाही ते पाहू शकता. कोणत्या मतदाराने कोणत्या मतदान केंद्रावर जाऊन मतदान करायचे आहे. व्होटर हेल्पलाइन ॲप गूगल प्ले स्टोअर आणि अॅपल स्टोअर वरून डाउनलोड केले जाऊ शकते.
निवडणूक प्रक्रिया मतदारांसाठी अधिक सोप्पी व्हावी या हेतूने निवडणूक आयोग दोन डझनहून अधिक ॲप्स निवडणुकीत वापरत आहे. त्यांची संपूर्ण माहिती निवडणूक आयोगाच्या वेबसाइटवर उपलब्ध आहे.आतापर्यंत मतदारांना त्यांच्या व्होटर स्लिपसाठी बीएलओ किंवा पक्षाच्या कार्यकर्त्यांवर अवलंबून राहावे लागत होते, मात्र आता मतदार हेल्पलाइन ॲपच्या माध्यमातून मतदारांना त्यांची व्होटर स्लिप फोटोसह मिळू शकते.
यावेळी लोकसभा निवडणुकीत निवडणूक आयोग २७ ॲप्स आणि आयटी प्रणालींद्वारे लोकांना मदत करणार आहे. या माध्यमातून एकीकडे पाळत ठेवण्यास मदत होणार आहे तर दुसरीकडे मतदारांना त्यांच्या उमेदवारांची माहिती मिळू शकणार आहे. निवडणूक लढवणाऱ्या उमेदवारांना ॲपद्वारे त्यांचे शपथपत्र आणि केवायसी पूर्ण करण्याची सुविधाही देण्यात आली आहे.
यासोबतच उमेदवारांना त्यांच्या रॅली आणि सभांसाठीही या ॲपद्वारे परवानगी घेता येणार आहे. याच क्रमाने निवडणूक आयोगही 'मिथ विरुद्ध रिॲलिटी'ची माहिती शेअर करत आहे. सोशल मीडियावर येणाऱ्या चुकीच्या माहितीबाबत लोकांना जागरूक करण्यासाठी ही पावले उचलण्यात येत असल्याचे निवडणूक आयोगाचे म्हणणे आहे. वेबसाइटच्या माध्यमातून ही माहिती लोकांपर्यंत पोहोचवली जात आहे. याशिवाय गुन्हेगारी रेकॉर्ड असलेल्या उमेदवारांना त्यांच्या गुन्हेगारी रेकॉर्डची माहिती तीन वेळा वर्तमानपत्रात द्यावी लागेल. हे टीव्हीवरही सांगावे लागेल. तसेच, संबंधित राजकीय पक्षांना गुन्हेगारी नोंदी असलेल्या उमेदवारांच्या निवडीबाबत माहिती शेअर करावी लागेल.
या लोकसभा निवडणुकीत सुमारे ९७ कोटी भारतीय मतदानासाठी पात्र ठरणार असल्याची माहिती भारतीय निवडणूक आयोगाने दिली आहे. निवडणूक आयोगाने अहवाल दिला आहे की भारतातील ९६.८८ कोटी लोकांनी आगामी सार्वत्रिक निवडणुकांसाठी मतदान करण्यासाठी नोंदणी केली आहे. आयोगाच्या म्हणण्यानुसार,२०१९ च्या लोकसभा निवडणुकीपासून नोंदणीकृत मतदारांची संख्या सहा टक्क्यांनी वाढली आहे.
