मताधिक्य वाढवण्यासाठी विशेष रणनीती वापरण्यावर भाजपचा भर
पणजी : केंद्रीय मंत्री श्रीपाद नाईक हे १९९९ सालापासून उत्तर गोवा मतदारसंघातून निवडून येत आहेत. उत्तर गोवा लोकसभा मतदारसंघ हा भाजपसाठी प्रतिष्ठेचा आहे. उत्तर गोव्यात केंद्रीय मंत्री श्रीपाद नाईक यांचे बहुमत कसे वाढवायचे याचा विचार पक्षाने सुरू केला आहे. भाजपचे विस्तारक सुनील कर्जतकर यांची बैठक याच धोरणात्मक संदर्भात होती, अशी माहिती सूत्रांकडून मिळाली.
भाजपचे विस्तारक सुनील कर्जतकर यांचे शनिवारी राज्यात आगमन झाले. त्यांनी पक्षाचे प्रवक्ते व सचिव दयानंद सोपटे तसेच अन्य आमदारांशी चर्चा केली. लोकसभा निवडणुका जवळ आल्या आहेत. पक्षाने मतदारसंघातील परिस्थितीचा आढावा घेण्यास सुरुवात केली आहे. उत्तर गोव्याची जबाबदारी विस्तारक सुनील कर्जतकर यांच्याकडे आहे. त्यामुळे उत्तर गोव्याचा त्यांनी दौरा केला. ते त्यांचे म्हणणे किंवा निरीक्षणे राष्ट्रीय अध्यक्ष किंवा केंद्रीय समितीपर्यंत पोहोचवतील, असे दयानंद सोपटे यांनी सांगितले. दक्षिण गोवा मतदारसंघासाठी अन्य पदाधिकारी येण्याची शक्यता आहे. भाजप हा संघटनात्मक पक्ष आहे. प्रत्येकाने दिलेली जबाबदारी पार पाडावी लागेल, असे दयानंद सोपटे म्हणाले.
केंद्रीय मंत्री श्रीपाद नाईक हे पक्षाचे ज्येष्ठ नेते आहेत. दिवंगत अटलबिहारी वाजपेयी यांच्या सरकारमध्ये ते मंत्री होते. नरेंद्र मोदी पंतप्रधान झाल्यापासून त्यांच्या मंत्रिमंडळात आहेत. २०१९ मध्ये त्यांचे बहुमत कमी झाले होते. उत्तर गोवा हा भाजपचा बालेकिल्ला असल्याने, केंद्रीय मंत्री श्रीपाद नाईक यांना विक्रमी बहुमताने जिंकविण्याची पक्षाची रणनीती आहे, असे एका पदाधिकाऱ्याने सांगितले.
लोकसभा निवडणुकीसाठी भाजपने विस्तारक समिती नेमली आहे. सुनील कर्जतकर हे समितीचे सदस्य आहेत. सुनील कर्जतकर यांच्याकडे गोव्यासह महाराष्ट्र, गुजरात, राजस्थान आणि दमण आणि दीवमधील अनेक मतदारसंघांची जबाबदारी आहे. ते या सर्व राज्यांना भेटी देतील आणि मतदारसंघनिहाय अहवाल देतील.
उत्तर गोव्यात भंडारी समाजाचे प्राबल्य आहे. अनेकवेळा निवडून आलेले केंद्रीय मंत्री श्रीपाद नाईक यांच्या विरोधात किती? याची चाचपणी पक्षाने सुरू केली आहे. त्यामुळे विस्तारक सुनील कर्जतदार यांची भेट महत्त्वाची आहे. सुनील कर्जतदार यांनी काही आमदारांशी तसेच पदाधिकाऱ्यांशी चर्चा केली आहे.
दक्षिण गोव्यासाठी वेगळी रणनीती
गेल्या वेळी दक्षिण गोवा मतदारसंघात भाजपच्या उमेदवाराचा पराभव झाला होता. दक्षिण गोव्यात ख्रिश्चन मतदारांचे प्राबल्य आहे. दक्षिण गोवा मतदारसंघासाठी वेगळी रणनीती असेल. ती रणनीती आखण्याची जबाबदारी दुसऱ्या नेत्यावर असेल.
