पणजी :हडफडे येथील ‘बर्च बाय रोमिओ लेन’ नाईट क्लबमध्ये ६ डिसेंबर २०२५ रोजी घडलेल्या भीषण आग दुर्घटनेतील २५ मृतांच्या कुटुंबीयांना ७ फेब्रुवारीपर्यंत प्रत्येकी २० लाख रुपयांची अंतरिम नुकसानभरपाई देण्याचा आदेश गोवास्थित मुंबई उच्च न्यायालयाने दिला.
ही रक्कम नाईट क्लबच्या ‘बिईंग जीएस हॉस्पिटॅलिटी गोवा हडफडे एलएलपी’ या कंपनीला न्यायालयात जमा करण्यास सांगितले आहे. याबाबतचा आदेश न्या. वाल्मिकी मिनेझिस आणि न्या. अमित जामसंडेकर या द्विसदस्यीय न्यायपीठाने दिला.
हडफडे येथील बर्च क्लबला ६ डिसेंबर रोजी लागलेल्या भीषण आगीत २५ जणांचा मृत्यू, तर सहा जण जखमी झाले होते. या दुर्घटनेची उच्च न्यायालयाने स्वेच्छा दखल घेऊन प्रथम अॅड. रोहित ब्राझ डिसा यांची आणि नंतर अॅड. तेरेन्स सिक्वेरा यांची अॅमिकस क्युरी म्हणून नियुक्ती केली.
न्यायालयाने दुर्घटनेत मृत पावलेल्यांच्या नातेवाईकांना नुकसानभरपाई मिळावी यावर भर दिला होता. त्यानुसार, क्लबचे मालक सौरभ लुथरा, गौरव लुथरा आणि व्यावसायिक भागीदार अजय गुप्ता यांनी मृत्यू पावलेल्या २५ जणांच्या कुटुंबीयांना १५ लाख रुपये देण्याचा प्रस्ताव न्यायालयात सादर केला होता. मागील सुनावणीत मृतांच्या कुटुंबीयांतर्फे अॅड. प्राची सावंत यांनी प्रस्तावाबाबत कुटुंबीयांशी चर्चा करून सदर रक्कम कमी असल्याचे न्यायालयात सांगितले. त्यांनी किमान ५० लाख रुपये नुकसानभरपाई मिळावी, अशी विनंती करून २० लाख रुपयांची अंतरिम नुकसानभरपाई देण्याची मागणी केली होती.
सोमवारी न्यायालयात सुनावणी झाली असता, न्यायालयाने कंपनीला आग दुर्घटनेतील २५ मृतांच्या कुटुंबीयांना ७ फेब्रुवारीपर्यंत प्रत्येकी २० लाख रुपयांची अंतरिम नुकसानभरपाई देण्याचा निर्देश जारी केला. तसेच सदर रक्कम तीन टप्प्यांत न्यायालयात जमा करण्यास सांगितले.
- **पहिला टप्पा :** ५ लाख रुपये १६ नोव्हेंबरपूर्वी जमा करावेत.
- **दुसरा टप्पा :** आणखी ५ लाख रुपये ७ डिसेंबरपूर्वी जमा करावेत.
- **तिसरा टप्पा :** उर्वरित १० लाख रुपये ७ फेब्रुवारीपूर्वी जमा करावेत.
या प्रकरणाची पुढील सुनावणी २ डिसेंबर रोजी ठेवली आहे.